P1.5M kang Trillanes alang sa Tabunok market

CEBU, Philippines - Nihatag si Senador Antonio Trillanes IV of P1.5 milyones isip hinabang sa pagpatukod sa bag-ong merkado sa Tabunok, dakbayan sa Talisay.

Matud ni Mayor Johnny Delos Reyes nga nisanong si Trillanes sa iya’ng gipangayo nga tabang nga matukod ang upat ka andana nga merkado publiko nga gibana-bana’ng mogasto og dili mominus P365 milyones. Si Delos Reyes nangayo og tabang sa mga Senador, ubang opisyal sa gobiyerno ug lakip na sa pribado’ng sektor human gibasura sa konseho ang paglakip sa annual budget karong tuiga sa pundo sa pagpatukod sa merkado.

Matud ni Delos Reyes nga ang pundo nga gihatag ni Trillanes isulod sa account sa Talisay aron matigum ug sa hinay-hinay maabot ra ang kantidad nga gikinahanglan.

Tinguha sa mayor nga sulod sa iyang termino matukod na ang gipangandoy sa mga Talisaynon nga hamugaway nga merkado publiko. Kini gumikan kay ang karaan nga istruktura delikado na sa mga manindahay gumikan sa ka gabok na human gitay-og sa linog. (Renan Alangilan/GMR)

CCCI piyait sa tinguha ni Trillanes

Nipiyait ang Cebu Chamber of Commerce and Industry sa tinguha ni Senador Antonio Trillanes IV nga himuo’ng upat ka buwan ang maternity leave sa mga empleyado. Matud sa presidente sa CCCI, Ma. Teresa Chan, nga sobra ra ang upat ka buwan nga maternity leave ug alkanse ang mga negosyante.

Alang kaniya igo na ang duha ka buwan nga maternity leave sa mga empleyado nga may madawat nga sweldo. Dugang niya nga posible pa nga dili na mo-hire og mga babaye nga empleyado ang kompaniya kung mapasar ang balaudnon ni Trillanes.

Ang kompaniya mapugos usab pag-hire og dugang kawani nga motrabaho sa mabiyaan nga gimbuhaton sa usa nga mag-maternity leave aron dili maapektohan ang operasyon. Tumong sa balaudnon ni Trillanes nga mas taas ang panahon sa pagpasuso sa mga bata nga matawo human nasuta sa pagtuon nga 32 sa usa ka libo ka bata sa Pilipinas nga ipanganak ang mamatay sa dili pa moabot sa edad nga 5-anyos. Giila sa World Health Organization ang breastfeeding isip maayo’ng pamaagi sa paghatag og nutrient sa mga masuso. (Decemay P. Padilla/GMR)(BANAT NEWS)