Gi-baseball bat

CEBU, Philippines - Asawa sa bise mayor sa lungsod sa Ronda gidakop human giingong iyang gibunalan og baseball bat ang usa ka abogada  diha sa Maximo Building, Cogon- Ramos ning dakbayan sa Sugbo.

Ang biktima giila nga si Atty. Jiecel Saguil Tiu, 30, taga Midori Plains lungsod sa Minglanilla samtang ang suspetsado giila nga si Pearl Gonzales Ungab, 41.

Matud pa ni Chief Inspector Wildemar Tiu, ang hepe sa Fuente Police Station nga nahinabi sa Banat News kasong frustrated murder ang ilang ipasaka batok sa suspetsado.

Sa inisyal nga imbestigasyon sa Fuente Police, gikatahong giatangan sa suspetsado ang biktima nga mogawas sa iyang gitrabahoan ayha niini gihimo sa krimen. Sumala pa nga sakay sa iyang sakyanan nga Toyota Vios ang biktima ug sa iyang paggawas gisundan kini sa suspetsado nga sakay sa Nissan Navarra dayon gibanggaan.

Sa dihang mihunong na ang sakyanan minaog sa sakyanan ang suspetsado dayon mikuha kini og baseball bat dayon gipuspusan ang samin sa sakyanan. Gi-abrihan sa suspek ang pultahan ug didto na gibunalan ang biktima nga nakaangkon og bun-og sa lawas.

Apan tayming nga didto sa maong lugar si Senior Police Officer 3 Alan Magaslo sa Traffic Police Group ug mao’y mipatunga ug  gidakop ang suspetsado.

Sigun pa sa hepe sa Fuente Police nga duna gayo’y kapasikaran ang pagpasaka nila og frustrated murder tungod kay giplanohan gayod sa suspetsado ang maong krimen. “Kung imong tan-awon ang hitabo, naa g’yu’y plano ang suspek, naa’y intention sa crime,” matud pa ni Tiu.

Si Tiu miingon nga human sa ilang pagsikop ni Ungab ila unta kini nga ibutang sa prisohan apan mihangyo kini nga magpadala sa tambalanan hinungdan nga gidala nila kini sa Cebu City Medical Center ug gibalhin dayon sa Vicente Sotto Memorial Medical Center base na sa advise sa ob-gyne nga si Dr. Cristine Rose Nonan kay matud pa buntis kini.

Adunay mga polis ang gipabantay ni Tiu sa hospital kay gipaubos kini sa hospital arrest.

“So I’m giving her a benefit of a doubt nga buntis siya, pero ato’ng pabantayan og polis ang iyang room kay she is under arrest of the said crime,” dugang pa ni Tiu.

Gisubay sa kapolisan ang anggulo nga selos ug uban pang posibleng motibo kun nganong nabuhat kadto sa asawa sa bise mayor. Nagpadayon pa ang imbestigasyon  sa kapulisan aron pagtino ug pagsubay pa sa maong hitabo. (Jojo C. Ugdol/EIM)(BANAT NEWS)