Problemado nagpusil sa ulo

CEBU, Philippines - Nagpusil sa kaugalingon ang usa ka salesman sa dalan Bonifacio, Tinago, dakbayan sa Sugbo diin ang patay’ng lawas nadiskubrehan sa kapuyo pasado alas 7 sa nakalabay nga gabii.

Ang naghikog patay naila nga si Menecio Rosalejos, 43, lumad nga taga Sta Fe, isla sa Bantayan ug nagtrabaho sa PSI Auto Supply.

Matud ni SPO2 Rommel Bancog sa homicide section sa Cebu City Police Office nga personal ug problema sa pamilya ang nagtukmod ni Rosalejos nga magpakamatay.

Alas 7:30 sa gabii diha’ng niabot sa ilang gipuy-an ang kapuyo nga si Teresita Cuyos mao’y iyang nakita nga nagbuy-od na sulod sa ilang balay si Rosalejos nga nagkadugo na ang ulo.

Tupad sa patay nga lawas ni Rosalejos nakita ang .38 paltik revolver nga may tulo ka bala ug usa ka basiyo.

Si Bancog niingon nga igo sa bala sa tampihak ang naangkon ni Rosalejos hinungdan nga kini nakabsan sa iyang kinabuhi.

Sa pagsubay sa kapolisan sa crime scene wala sila’y nakita nga timailhan nga aduna’y foul play ang maong hitabo. (Jojo C. Ugdol/GMR)(BANAT NEWS)