Dispatser gidakop sa akto
CEBU, Philippines – Gidakop sa kapolisan ang usa ka dispatser nga naaktohan nga nangolekta og sinsiyo sa mga drayber sa dalan Plaridel, Umapad, dakbayan sa Mandaue alas 9 pasado sa buntag niadtong Sabado.
Si SPO3 Juan Calamba sa Presinto 6 sa Mandaue City Police Office (MCPO) niila sa nadakpan nga si Glenn Garcia, 33-anyos nga taga Purok Tambis sa maong barangay.
Sayo pa sa buntag nagsugod sa pag-atang ang dinakpan og mga public utility jeepney sa maong lugar ug nanawag og pasahero.
Ang duha ka sakop sa Traffic Enforcement Agency of Mandaue (TEAM) nga sila si Alexander Derelon ug Ruel Balansag nga naagi sa lugar ang nakamatikod sa suspek kinsa gidakop sa akto nga nidawat sa P5 gikan sa usa ka PUJ drayber.
Si Calamba niingon nga base sa Anti-Dispatching Ordinance, ang pagpanawag og pasahero daplin sa kadalanan alang sa pagsakay sa PUJ, taxi, tricycle, bus nga pasaheroan ug uban pa bugti sa pagkolekta og kuwarta gikan sa drayber usa ka daku’ng kalapasan.
Ubos sa maong ordinansa ang madakpan mahimong ibalhug sa bilanggoan sulod sa tulo ka buwan o mobayad og P400 nga multa pinasikad sa kamandoan sa korte. – /GMR) (BANAT NEWS)
- Latest