Motor napasok sa SUV, drayber patay
CEBU, Philippines – Buak ang ulo sa usa ka lalaki nga nagmaneho og motorsiklo human nabunal sa aspaltadong dalan dihang nabangga-an sa usa ka Ford Explorer sa barangay Liong, lungsod sa Dumanjug pasado alas 5 sa nakalabay nga kadlawon.
Ang biktima naila nga si Vicente Bulawan, hingkod, ulitawo nga taga Lahing-lahing, Mabolo, dakbayan sa Sugbo samtang ang drayber sa SUV naila nga si Clark Servan, 22, minyo nga taga Poblacion, Ginatilan.
Matud ni PO1 Edmundo Sala, desk officer sa Dumanjug Police, nga paingon sa dakbayan sa Sugbo ang SUV gikan sa Ginatilan ug gikan sa dakbayan sa Sugbo si Bulawan nga paingon sa Lawaan, Dumanjug aron mamista sa iyang mga paryente.
Pag-abot sa maong lugar kalit lang niliko si Bulawan ug wala nabantayi ang kusog nga dagan sa nagdulhog nga SUV hinungdan nga kini nabanggaan.
Sa kakusog sa bangga nagkatag ug nawasak ang motorsiklo ug gikataho’ng nilupad ang drayber sa motorsiklo.
Sigun pa ni Sala nga nilupad sab ang helmet sa biktima hinungdan sa pagkabuak sa ulo niini.
Sa pagsubay ni Sala sa lugar, nasuta nga kapin usa ka gatus ka tiil ang lakra sa ligid sa SUV nga naka-brake na ug didto nadasok ang motorsiklo sa sakyanan.
Hinuon wala na’y plano nga mopasaka og kaso ang pamilya sa biktima human nga nagkasabot ra ang duha ka habig human nisaad ang pamilya sa nakabangga nga motabang sa tanan nga gastohanan sa pagpalubong sa namatay. – /GMR) (BANAT NEWS)
- Latest
