CVIRAA manager mosusi sa Balamban, Asturias
CEBU, Philippines – Mopahigayun og ocular inspection ugmang adlawa ang mga tournament managers sa Central Visayas Regional Athletic Association (CVIRAA) sa mga playing venues sa lungsod sa Balamban ug Asturias.
Kini base sa memorandum sa Department of Education nga gipadangat sa buhatan nilang Balamban Mayor Stefan Ace Binghay ug Asturias Mayor Allan Adlawan.
Ang lungsod sa Balamban ang napili nga host sa rehiyonal nga kalihukan sa paugnat sa kusog.
Hinuon wala pa natakda ang final nga mga adlaw sa CVIRAA Meet.
Una’ng gitakda ang kalihukan sa Pebrero 22 hangtud 27 apan giplanohan nga isibog sa Pebrero 27 hangtud Marso 2.
Gikinahanglan pa usab nga aprobahan sa gobernador sa probinsiya sa Sugbo ug sa mayor sa Balamban.
Kinahanglan usab nga matapos na ang CVIRAA Meet sa dili pa ang Marso 5 nga maoy adlaw sa National Achievement Test (NAT) alang sa mga tinun-an. – /GMR) (BANAT NEWS)
- Latest