Tax holiday gitinguha

CEBU, Philippines - Giduso karon sa konseho sa siyudad sa Sugbo ang pagtugot og tax holiday o tax relief sa mga wala nabayaran nga real property taxes sa mga niaging tuig.

Si Konsehal Noel Wenceslao niduso sa ordinansahon tumong nga epektibo ang pagkolekta sa mga wala nabayri nga real property tax ug alang sab sa pagpataas sa kita sa siyudad.

Matud ni Wenceslao nga ang usa ka taxpayer adunay siyento porsiyento nga tax holiday o tax relief sa pamaagi nga pagwagtang sa interest sa wala nabayari nga real property tax sugod Enero 2009 hangtud 2014 ug adunay 50 porsiyento nga tangtangon nga interest sa wala nabayri nga real property tax sugod Enero 2008 ug nag-una pa nga mga tuig. Gibutyag ni Wenceslao nga iyang namatikdan sa records sa City Treasurer’s Office nga adunay daghan pa’ng kolektahonon ang siyudad nga buhis sa niaging tuig.

Ang ordinansahon gitawag og “The Cebu City Real Property Tax Holiday Ordinance of 2015.”

Ang maong ordinansahon anaa sa committee on laws nga gipangulohan ni Konsehal Sisinio Andales.

Matud ni Wenceslao nga ang pagtugot og tax holiday o tax relief sa interest sa mga wala kabayad og real property tax mohatag og incentive ug makadasig sa mga taxpayers nga mobayad sa ilang bayronon.

Sa maong paagi, dugang niya nga mo-usbaw ang tax collection sa siyudad. Kadtong real properties nga gi-public auction dili na maapil sa maong tax holiday.

Ang mga taxpayers mamahimong mo-apply sa tax holiday o tax relief sa opisina sa City Treasurer sa siyudad.  (BANAT NEWS)