Tulo ka pusher sikop

CEBU, Philippines - Tulo ka gikatahapang pusher ang nadakpan sa buy-bust operation diha sa Purok Agbate, Barangay Cambaro, Dakbayan sa Mandaue. Si Police Officer 1 Melvin Menesterio sa kapolisan sa Presinto 1 sa Mandaue City Police Office miila sa mga dinakpan mao sila si Ralph Comendador, 38, George Cabanlit, 33, ug Antonio Cumayas, 46, pulos nagpuyo sa maong dapit.

Dugang pa ni Menesterio nga nakuha nila ang lima ka paketeng shabu nga nagkantidad og P200 ang matag usa gikan sa mga suspetsado.

Matud pa ni Menesterio nga ang ilang kauban nga maoy nagsilbing poseur buyer maoy nagpatuo nga pumapalit og shabu ug dihang gitunol na ang usa ka pakete dali kini nilang gisignit. Dihang ilang girekisa ang kalawasan sa mga dinakpan nakuhaan sila og dugang upat ka paketeng shabu.

Kaso nga kalapasan sa Section 11, Section 12 ug Section 5 ubos sa Article 2 sa Republic Act 9165 o Comprehensive Dangerous Drug Act  ang gipasaka batok sa tulo.(Romeo T. Limpangog/EIM)(BANAT NEWS)