“Walk for Sympathy” alang sa 44 PNP-SAF

CEBU, Philippines - Moabot  dul-an 800 ka mga polis ang misalmot sa “Walk for Sympathy” isip pagkondena, pagbangutan lakip na ang pagpaabot sa mensahe   alang sa patas nga imbestigasyon sa kamatayon sa 44 ka mga sakop sa Special Action Force (SAF) didto sa barangay Tokanalipao, Mamasapano, Maguindanao.

Ang mga polis misugod paglakaw gikan sa Cebu IT Park paingon sa Police Regional Office-7 ug mihimo og usa ka Santos nga Misa alang sa kapahulayang dayon sa mga napatay nga sakop sa SAF. Ang mga polis nga naggikan sa Rehiyon 7 ilabina ang mga sakop sa alumni sa Philippine National Police Academy (PNPA) nga pulos nakasuot og black arm bands isip pagsimpatiya ilabina sa mga nahibiling pamilya sa mga namatay.

“This is to make our stand that we are one of supporting and sharing our sympathy for the slain policemen,” matud pa sa presidente sa PNPA Alumi sa region 7 ug hepe sa Provincial Intelligence Branch nga si Superintendent Rodolfo Albotra.

Mipasalig usab kini nga mosunod sila sa balaod ug magpaabot sa unsa man nga mahukman sa PNPA Alumni base sa resulta sa imbestigasyon sa Board of Inquiry. Samtang sa isyu sa mass leave sa mga PNPA officials si Albotra mipasabot nga kini dili mandatory apan ang tanan nga polis duna’y katungod sa pag-leave o pag-absent.

Ang Officer In-Charge sa Cebu City Police Office, Sr. Supt. Conrad Capa nagbutang og tarpaulins sa ganghaan sa Camp Sotero Cabahug nga duna’y hulagway sa mga namatay nga mga SAF members aron mabutangan og bulak ug dagkotan og kandila agi og pagrespeto ug pagbangutan sa hitabo.

Atol sa necrological service sa Camp Bagong Diwa sa Taguig City, ang kampo sa PNP-SAF, ang biyuda ni Sr. Insp. Ryan Pabalinas miapelar nga mahatagan og hustisya ang mga nakalas.

"All I ask right now is justice, not only for my husband, but for everyone who fought and fell," dugang pa sa masulob-ong si Erica Pabalinas.

Giawhag usab niya ang katawhan nga dili unta hunahunaon sa kadaghanan nga nag-apas ang maong mga polis sa $5milyones nga reward sa ulo sa Jemaah Islamiyah bombmaker nga si Zulkifli bin Hir,  alyas Commander Marwan.

Samtang sa eulogy ni SAF officer-in-charge Chief Supt. Noli Talino namahayag nga wa mausik ang sakripisyo sa 44 kontra sa kinabuhi ni Marwan.

"One international terrorist equals 44 deaths... Was it worth it?"  pangutana pa ni Talino, ug pagkahuman misumpay niini sa pag-ingon: "I am sure na when you ask them (mga namatay na SAF), they will say yes. Dahil mas marami pang buhay ang maisasalba." Daan nang namahayag ang gipalagpot nga hepe sa PNP-SAF nga si Chief Supt. Getulio Pascua Napeñas sa interbyu kaniya sa GMA News nga positibong napatay sa iyang mga sakop si Marwan. Si Presidente Benigno Aquino III kinsa naminaw sa mga pamahayag sa mga kabanay sa namatay nga polis misaad nga ihatag sa gobiyerno ang hustisya ug panginahanglanon sa pamilya sa mga namatay.

Matud niya nga numero uno karon nila nga target si Basit Usman, ang lider sa teroristang pundok sa Bangsamoro Islamic Freedom Fighters nga nangulo sa pagpatay sa mga SAF kauban sa MILF.

Sa tonada ni Aquino, bisan wala pay DNA test, gikompirmar na niyang patay na si Marwan, kinsa maoy number one target sa maong operasyon.

Sa report sa GMA News 24-Oras kagabii, gikompirmar sa MILF nga patay na si Marwan. (Jojo Ugdol ug report gikan sa Wires/EIM)(BANAT NEWS)