P1.5M shabu
CEBU, Philippines - Mokabat sa P1.5 milyon nga kantidad sa drugas ang nasakmit sa joint operation nga gilusad sa City Anti-Illegal Drugs Special Operations Task Group sa Cebu City Police Office ug sa San Nicolas Police Station batok sa usa ka notadong drug suspek sa Gen. Gines Street, Barangay Sawang Calero.
Ang suspetsado naila nga si Richard Plando, 25, nagpuyo sa maong lugar apan lumad nga taga lungsod sa Alcoy.
Sumala pa ni Senior Inspector Eunil Avergonzado ang hepe sa CAIDSOTG nga atol sa buy-bust operation, usa ka medium size nga paketeng shabu ang napalit sa asset sa kapulisan gamit ang marked money nga nagkantidad og usa ka libo ka pesos.
Human sa pagtunol sa suspetsado sa drugas dali kini nga gisikop apan nakadagan kini paingon sa iyang lawak hinungdan nga kini gigukod ug nasakpan na hinuon ang daghang drugas. Dugang unom ka dagkong putos, usa ka gamay nga putos sa gituohang shabu ug cash nga P2,000 ang ilang nakuha.
Sa pakighinabi sa Banat News sa suspetsado kini miangkon nga namaligya siya og drugas apan mipasangil nga “planted” ang uban nga mga drugas nga nakuha sa iyang lawak.
“Moangkon ko nga mamaligya ko pero daghan ra kaayo to uy. Mura man ‘ta ana og big time,” matud pa ni Plando kinsa miangkon usab nga mao lang kini iyang panginabuhian.
Miangkon usab siyang nadakpan na siya niadtong nakalabay nga bulan sa Disyembre apan nakapiyansa. (Jojo C. Ugdol/EIM)(BANAT NEWS)
- Latest
