Mass leave sa PRO-7 huna-hunaon
CEBU, Philippines - Hunahunaon sa kadagkoan sa Police Regional Office-7 kun mosalmot ba sila sa plano’ng mass leave sa mga sakop sa kapolisan human sa pagkapatay sa 44 ka sakop sa Philippine National Police Special Action Force sa Maguindanao.
Kini ang gipadayag nila’ng Sr. Supt. Conrad Capa, PRO-7 deputy director for operations ug kasamtanga’ng direktor sa Cebu City Police Office, ug Sr. Supt. Noel Gillamac, direktor sa Cebu Provincial Police Office. Gidiskurahi ni Capa ang mass leave sanglit segurado gyud nga maapektohan ang operasyon sa kapolisan.
Matud ni Capa nga dili na kinahanglan nga mobiya sa ilang trabaho ang mga opisyal sa PNPA aron ipakita ang protesta sa maong hitabo.
Si Capa emosyonal nga nihatag sa iyang reaksiyon sa gidangatan sa mga sakop sa SAF sa Mamasapano, Maguindanao.
“My heart bleeds for these SAF troopers. It’s very unfortunate,” pamahayag ni Capa.
Napungot sab si Capa sa iyang nakita nga pagbugal bugal sa mga sakop sa Moro Islamic Liberation Front (MILF) nga duna pa’y mga patay nga mga sakop sa SAF ang gipangtumban ang ulo.
“We cannot and we should not forgive them for that,” matud ni Capa.
Gipasabot ni Capa nga ang mga nangamatay nga mga polis pulos pa mga batan-on ug angay unta nga hatagan og dignidad sa ilang kamatayun.
Ang maong hitabo giingong mao’y labing daghang natala nga patay sa han-ay sa kapolisan sa usa ka adlaw lang nga engkwentro sa kasaysayan sa PNP ug bisan pa man sa Philippine Constabulary.
Nasayran nga si Capa nahimo’ng sakop sa SAF sulod sa upat ka tuig niadtong 1985 ug mibiya sa 1989.
Wala na sab nihatag og pamahayag ang opisyal may labot sa giingong misencounter ang nahitabo. (BANAT NEWS)
- Latest