Lalawigan sa Sugbo nagbangotan

CEBU, Philippines - Gikasubo sa lalawigan sa Sugbo ang pagkamatay sa duha ka Sugbuanong pulis nga sakop sa Special Action Force (SAF) sa Mamasapano, Maguindanao.

Kapin sa 40 ka mga sakop sa PNP-SAF ang nakalas human matud pa nag-“misencounter” sa mga naghiusang rebeldeng Moro Islamic Liberation Front ug  Bangsamoro Islamic Freedom Fighters (BIFF).

Ang duha sa mga nakalas nga Sugbuanon mao sila si PO1 Romeo Cempron nga taga Barangay Tayud, lungsod sa Consolacion ug PO1 Wendell Candano, taga Barangay Lawaan, lungsod sa Dumanjug.

Si Gobernador Hilario Davide III lakip na ang Kapitolyo mipadayag sa ilang kaandam pagpaabot og tabang sa nabiyaang pamilya sa maong mga pulis ilabi na nga gikonsiderar sila nga mga bayani sa atong nasud.

Samtang karong adlawa, gipaabot nga moabot dinhi sa Sugbo ang patay’ng lawas sa mga Sugbuanong nakalas. 

Kagahapon gihatud ni Cebu Provincial Police Office Senior Superintendent Noel Gillamac sa mga pamilya sa duha ka napatay nga SAF ang suwat gikan  ni PNP OIC Director General Leonardo Espina nga nagpaabot sa pahasubo ug pagdayeg usab sa duha tungod sa sakripisyong ilang gihatag sa pagserbisyo sa nasud. (BANAT NEWS)