Bata nakuryentehan sulod sa Mall
CEBU, Philippines – Patay ang usa ka 3-anyos nga bata’ng- lalaki nga nakuryentehan sulod sa usa ka mall didto sa Barangay Lawaan 1, dakbayan sa Talisay kaniadto’ng Lunes sa gabii.
Ang namatay mao si si Mike Christer Manzano, taga Barangay Dumlog, Talisay.
Sumala pa ni PO3 Jason Del Campo, desk officer sa Talisay City Police Station, nga atol sa maong hitabo kauban sa bata ang iyang igsoon nga babaye ug ang bana niini nga nangompra.
Sa paglibot-libot nila sulod sa mall, naabot ang bata sa baligyaanan sa mga karne ug gituohan nga nakuryentihan kini sa “meat chiller” nga butanganan sa karne.
Human sa hitabo, dali ‘sab nga gidala ang maong bata sa Baking Medical Center sa dakbayan sa Talisay, apan patay na kini pag-abot sa maong tambalanan.
Gitan-aw karon sa kapolisan nga hayan “grounded” ang chiller ug nahikapan sa bata.
Matud ni PO3 Del Campo nga ang insedente nahitabo alas 8:50 pa sa gabii apan sila napahibalo hapit na tungang gabii human nga may mitawag kanila nga concerned citizen. Hangtud kagahapon wala pay pamilya sa bata nga miadto sa kapolisan aron ipa-blotter ang nahitabo ug aron sila makapasaka og kaso sa tag-iya sa Mall. – /RUB) (BANAT NEWS)
- Latest
