Problema sa budget sa Talisay hisgotan karon
CEBU, Philippines – Ang mga sakop sa Talisay City Council mag-abot karong adlawa sa opisina ni Provincial Board Member Grecilda Sanchez aron hisgotan nila ang isyu kabahin sa paglaslas sa annual budget sa Talisay.
Si Sanchez miingon nga nalipay siya nga misanong ang mga konsehal sa Talisay sa iyang imbitasyon nga mobisita sa iyang buhatan aron mahisgutan ang problema tali sa executive ug legislative officials sa Talisay ug pamasin nga mahatagan og kasulbaran ang ilang problema.
Si Mayor Johnny De Los Reyes miadto sa opisina ni Sanchez kaniadto’ng miagi’ng semana ug nangayo’g tabang sa paglaslas sa konseho sa gisugyot niya nga 2015 annual budget sa siyudad.
Mikabat sa P1.089 bilyones ang kinatibuk-ang proposed 2015 annual budget sa Talisay apan gilaslasan kini ngadto na lang sa P539 milyones.
Si Bise Mayor Romeo Villarante nagkanayon nga mahimo ra nga makasugyot si Mayor JVR og supplemental budget kun magkuwang ang budget sa siyudad nga ilang gipasar.
Gitan-aw ni Sanchez nga sa kadaku sa kantidad nga gilaslas sa budget sa Talisay posible g’yud nga maglisud paglihok si Mayor JVR aron mapatuman ang iyang proyekto.
Matud ni Sanchez nga sa maong sitwasyon ang katawhan maoy maapektohan kay dili na man makahatag og maayong serbisyo ang siyudad tungod sa kakuwang sa budget.
Direkta’ng paminawon ni Sanchez ang rason sa mga sakop sa konseho kun ngano nga gilaslas nila ang halos katunga sa gisugyot nga budget ni Mayor JVR. Si Sanchez nga maoy chairman sa committee on budget and finance sa probinsiya nagkanayon nga posibleng ang kagamhanan sa probinsiya makahatag og tabang sa Talisay kun gikinahanglan. – /RUB) (BANAT NEWS)
- Latest
