Pahapsayon ta ang karsada sa dakbayan
CEBU, Philippines – Ang grupo sa mga professionals dinhi sa dakbayan sa Sugbo andam motabang sa CITOM pagpahapsay sa trapiko.
Ang Professionals for Active Citizenship and Transformation (PACT) midapit kagahapon ni CITOM operations chief Joy Tumulak aron sila kagiyahan sa ilang pagahimuon.
Ang PACT usa ka grupo nga nahulma sa Facebook kang kansang tumong mao ang pagtampo og tabang alang sa positive change sa komunidad, ilabi na sa traffic sa dakbayan.
Pasiunang adbokasiya sa maong grupo mao ang pagpakita’g respetar sa “junction box” nga anaa sa intersections. Ang junction box mao ang yellow nga badlis nga anaa sa mga dagko’ng eskena.
Bisan og “Go” pa ang signal apan wala pa’y kalutsan sa unahan, ang usa ka motorista dili g’yud angay’ng mopadayon sa pagpadagan aron nga dili siya makababag sa karsada kun mo “go” na ang signal sa pikas eskena.
Si Cerwin Eviota, sakop sa PACT, miingon nga angay mahibaw-an sa publiko ang tanang balaod sa kadalanan aron hapsay ang dagan sa trapiko ug walay mga badlongon.
Nagpasalamat si Tumulak sa maong grupo tungod kay matud pa nga dili maato sa CITOM ang tanang problema sa kadalanan.
Matud ni Tumulak nga ang CITOM duna lay 230 ka traffic enforcer ug dili nila maato ang nagkadaghan nga mga sakyanan. – /RUB) (BANAT NEWS)
- Latest
