Tulo ka pushers sa Mandaue nasikop

CEBU, Philippines - Nadakpan sa kapolisan ang tulo ka gikatahapang pusher og shabu sa managlahi’ng buy-bust operation hinungdan sa pagkasakmit sa mga penakete’ng shabu ug mga paraphernalia.

Si Senior Inspector Jimmy Portes, hepe sa Presinto 1 sa Mandaue City Police Office (MCPO), ang nangulo sa buy-bust operation sa Zone 4, Mantuyong alas 11 sa gabii diin nasikop ang duha ka tawo. Giila ni Police Officer 2 Jesson Flores ang nadakpan nga sila si Darrel Vasquez, 44-anyos, nagpuyo sa maong dapit kinsa ilang nasakmitan og unom ka gagmay nga pakete’ng shabu, mga drug paraphernalia, P200 nga marked money ug uban pa. Laing nadakpan sa kapolisan sa Presinto 3 sa MCPO nga gipangulohan sa hepe nga si Senior Inspector Ramil Luga Jr. mao ang managsuon nga sila si Reynan Oseo, 26, ug Reymark Oseo, 33, pulos nagpuyo sa Housing, barangay Canduman, sa maong dakbayan. Ang duha nasakmitan og usa ka pakete’ng shabu, mga tin foil ug mga drug paraphernalia. (BANAT NEWS)