Pusher sa Daanbantayan nadakpan

CEBU, Philippines - Mokabat sa P120,000 nga kantidad sa drugas ang nasakmit sa kapolisan sa lungsod sa Daanbantayan human sa gihimo’ng buy-bust operation sa sitio Bandilaan, barangay Bagay sa nakalabay nga kadlawon.

Ang mga nasikop naila nga sila si Harly Gastador, 43, nga mao’y target sa kapolisan ug ang iyang kapuyo nga si Loida Laya-og, hingkod ug nagpuyo sa maong lugar.

Matud ni PO3 Alex Ricarte, desk officer sa Daanbantayan Police, si Gastador ilang gihulagway nga idlas ug usa ka level 2 drug pusher.

Sumala pa ni Ricarte nga usa sa ilang problema kay sudlonon ang lugar nga gipuy-an sa mag live-in ug halos sab tanan nga nagpuyo  sa lugar mga paryente sa mga suspek.

Alas 4:30 sa kadlawon, gamit ang P300 nga marked money, nakapalit og usa ka gamay nga putos sa gituohang drugas ang asset sa kapolisan hinungdan nga dali nga gisikop sa mga polis ang mga suspek.

Gipasabot ni Ricarte nga ilang giapil og sikop ang babaye kay apil kini sa ilegal nga kalihukan.

Nakuha sa kapolisan ang tulo ka dagku nga putos sa gituohang drugas ug pito ka gagmay nga pakete nga mikantidad og P120,100.

Gitug-an sa duha  nga sa barangay Ermita, siyudad sa Sugbo sila magkomprahan og drugas.

Nasayran sa kapolisan nga nabilanggo na kaniadto si Gastador gumikan sa kasong street robbery sa nagpuyo pa sa dakbayan sa Sugbo.

May mga resibo sa money remittance center nga nakuha ang kapolisan nga dunay dagku nga kantidad sa salapi ang gipadala ni Gastador sa usa ka tawo nga apil karon nga gisubay sa kapolisan.

Gitanggong sa Daanbantayan Police Station ang duha ka dinakpan nga pasakaan og tukmang kaso.

Samtang sa lungsod sa Balamban, usa ka 39-anyos nga lalaki ang nasikop sa buy-bust operation nga nakuhaan og drugas ug armas niadtong nakalabay nga hapon sa barangay Nangka.

Ang dinakpan naila nga si Roderick Lucero, minyo ug nagpuyo sa maong lugar.

Nakuha sa kapolisan gikan sa suspek ang duha ka gagmay nga pakete, usa ka medium size sa gituohang drugas, duha ka tag P100 nga marked money ug usa ka .45 caliber pistol nga dunay upat ka bala.

Kaso’ng paghupot og drugas ug ilegal nga armas ang atubangon sa suspek nga gipaslak na sa Balamban Police Station detention cell. (BANAT NEWS)