Papal visit sa Leyte naputol tungod ni Amang

CEBU, Philippines – Napugos pagputol ang Santo Papa sa iyang pagbisita sa Palo, Leyte kagahapon human mirekomendar ang piloto sa iyang abyon nga kinahanglang mobiya na sila sa Tacloban City tungod sa hulga sa bagyong Amang.

Bisan masulob-on si Pope Francis sa kausaban sa iyang lakaw, apan wala niya pakyasa ang gibanabanang kapin usa ka gatos ka libong nakasulod sa giandam nga venue aron sa pagtambong sa Santos nga Misa ug sa liboan usab nga nagpunsisok sa gawas ug sa dalan sa gawas sa Tacloban City airport.

Mibati ko kaninyo

Kadaghanan sa mga nanambong mga survivors sa bagyong Yolanda niadtong 2013 ug nahimong emosyonal kaayo ang homiliya sa Santo Papa gumikan sa dako niyang kasubo sa nahiaguman sa taga Eastern Visayas. Gani atol sa pagsaulog sa Santos nga Misa nagpunay og uwan mao nga ang tanang mga tawo nagsul-ob og yellow nga raincoats lakip na si Pope Francis.

Sa pagtugpa pa lang sa abyon nga iyang giluwanan, gibahaan na ang tarmac ug gisugat kini dayon sa mga organizers og kapote sa wala pa siya mosaka sa entablado aron magmisa.

“I would like to tell to you something close to my heart, when I saw in Rome that catastrophe, I felt I had to be here. And on those very days, I decided to come here. I’m here to be with you,” matud pa sa Santo Papa atubangan sa mga nanimba nga ang uban nagkupot og rosaryohan ug naghilak.

Gipahibalo usab niya nga nasayod siyang daghan ang nakalas sa mga miyembro sa pamilya sa mga nanimba, apan ang iyaha lang mahimo mao ang pagduyog kanila sa hilom, iyang gipasalig sa katawhan nga kanunay nga naa kanila si Hesus ug dili sila pasagdan.

Human sa Misa, milibot si Francis luwan sa Popemobil sa mga quadrants nga gikahimutangan sa mga tawo, duna pay higayon nga gipahunong niya ang convoy aron bendisyonan ang usa ka bata diha sa pundok sa mga tawo.

Biyernes pa nagpaabot

Ang bagyong Yolanda (Haiyan) mikalas og kapin 7,300 ka tawo, kapin sa usa ka milyon ka panimalay ang nangaguba, nagdala kini og storm surge nga moabot og pito ka metros, 16 milyones ka punoan sa lubi ang gilarot ug binilyon ka pesos ang gibiling danyos sa mga imprastraktura.

Nasayran nga pipila sa mga nakasulod sa venue ang nagpaabot nang daan niadto pang adlaw nga Biyernes ug ang uban nanagsuot og adult diapers aron lang makita sa personal ang Santo Papa sa unang higayon sa ilang kinabuhi.

Una pa mobiya ang Santo Papa sa Palo, iyang giawhag ang mga tawo nga awitan og “happy birthday” si Cardinal Pietro Parolin, ang Vatican secretary of state nga nagsaulog sa iyang ika-60 nga adlaw nga natawhan. Gikauban sa Santo Papa sa paniudto ang 30 ka mga piniling pamilyang survivors nga nagrepresentar sa mga biktima sa bagyong Yolanda ug 7.2 magnitude nga linog sa Bohol diha sa Palo.

Daghang naguol

Ang bagyong  Amang (Mekkhala) nagdala og 100 kilometers (60 miles) kada oras nga hangin ug may unos nga 130 kph (80 mph), ug gipaabot nga mag landfall sa Samar Island 62 kilometros (39 miles) sa amihanang sidlakan sa Tacloban kagahapon sa hapon.

Dihang nananghid ang Santo Papa sa mga nanambong sa Palo Cathedral nga sayo niyang putlon ang iyang pagduaw tungod sa bagyo, daghan ang gibati og kadismaya o kaguol tungod kay tataw kaayong gikuwangan pa sila sa mga oras nga ilang gikauban si Pope Francis, duna pay misinggit og “no!.”

Apan daling mipasabot ang  Santo Papa nga dili man mahimong patugpahon ang abyon sa Palo tungod kay nagkinahanglan pa silang mobiyahe balik sa Tacloban City aron mosakay sa abyon balik sa Manila. Usa ka imahen sa Madonna ang gihatag ni Presidente Benigno Aquino III  nga gikulit gikan sa usa sa mga punoan sa kahoy nga giibot sa bagyong Yolanda sumala pa sa  tigpamaba sa Vatican.

Luwas nga nakabalik sa Villamor Airbase si Pope Francis  alas-2 sa hapon luwan sa Philippine Airlines Airbus A320 diin gisugat sila sa mga tag-as nga opisyal sa Armed Forces of the Philippines ug Philippine National Police. 

Ang mga sakop sa militar uban sa ilang mga pamilya maoy misugat kaniya ug iyaha silang gitimbaya ug gibendisyonan lakip na ang mga bata ug mga masakitong nagpaabot sa iyang pagbalik gikan sa Leyte.

Natagaka’g speaker patay

Usa sa mga babayeng miboluntaryo pagtabang sa simbahan alang sa pag-abot sa Santo Papa ang namatay human kini natagakan og puthaw nga damba nga gipatungan sa speakers diha sa giandam nga pahigayonan sa Santos nga Misa sa Tacloban City Airport, sumala pa sa report sa GMA News.tv.

Matud pa sa tigpamaba sa Archdiocese of Palo, nga si Father Amadeo Alvero, ang kakusog sa hanging dala sa bagyong Amang maoy hinungdan niini.

Abyon nadusmo

Nadusmo ang abyon nga gisakyan sa mga tag-as nga opisyal sa administrasyong Aquino nga nagsunod sa abyon ni Pope Francis sa dayon nang lupad niini kagahapon sa Tacloban City Airport.

Swerteng wala’y bisan usa sa mga luwan niini nga gipangulohan ni executive secretary Paquito Ochoa ang nakalas o naangol sa maong aksidente sumala pa sa report sa DZMM radio.

Kauban ni Ochoa ang tigpamaba sa Malacañang nga sila si Herminio Coloma ug uban pa nga maoy kauban sa Santo Papa apan luwan sa laing chartered nga abyon sa pagduaw sa Tacloban City.  (BANAT NEWS)