Kapolisan reklamo sa ka istrikto sa VSMMC

CEBU, Philippines – Dismayado ang taga Homicide Section sa Cebu City Police Office sa palisiya nga gipatuman sa Vicente Sotto Memorial Medical Center (VSMMC) diin apektado ang ilang imbestigasyon sa mga kaso.

Ang hepe sa Homicide Section nga si Sr. Insp. Elisandro Quijano nipagawas sa iyang kasagmuyo human sa taud-taud na nila’ng pag-antus sa ka istrikto sa maong tambalanan diin dili pasudlon ang mga polis aron unta pag-interview sa mga biktima sa krimen.

Usa sa gikasagmuyo sa opisyal nga daw sa nakaminus sa mga polis ang gipatuman nga pamalaud sa tambalanan nga dili gyud magpasulod og polis.

Gipasabot ni Quijano nga bugtong tuyo nila nga moadto sa tambalanan aron pagtuman sa ilang trabaho ug makahimo sa pag-imbestigar sa mga krimen.

“Dili man mi bugo nga dili makasabot sa trabaho namo, katungod sa matag pasyente nga mahatag namo ang hustisya sa ilang kaso ug dili mi pasudlon, unsaon man namo pag-imbestigar?” matud ni Quijano.

Dugang ni Quijano nga sa pribadong hospital, makasulod ra ang mga polis basta ibilin ang armas.

Apil sa nipadayag sa iyang kasagmuyo si SPO1 Ruth Violango, usa sa mga imbestigador sa homicide section.

“Mura gyud mi og mga bata nga nagdula og tubig-tubig, atang-atangan man mi sa mga guwardiya, naa pa’y ilang nurse nga murag kinsa’ng hawora nga masuko pa. Wala seguro na sila kasabot sa trabaho namo kay kami unta nakasabot man og unsa’y trabaho nila,” sigun pa ni Violango.

Tinguha sa CCPO nga ipadangat ang maong problema ngadto sa Police Coordinating and Advisory Council sayo sunod tuig.

Matud ni Quijano nga nagpadala na sab sila og suwat sa VSMMC niadtong buwan pa sa Agosto may labot gihapon sa maong reklamo diin igo lang sila giingnan nga motawag lang sa ilang buhatan aron makig-estorya apan hangtud karon wala nahitabo.

“Maong moreklamo mi kay ang saad nila wala gyud natuman sige ra mi og paabot, unsay pagtuo nila namo dili kabalo moreklamo? Kabalo mi nga sakto ni among gibarugan, bahala’g asa mi mag-abot nila,” dugang ni Quijano. – /GMR) (BANAT NEWS)