Presyo sa pang noche buena wa mosaka—DTI

CEBU, Philippines – Walay dakong pagtaas sa mga presyo sa noche Buena products dinhi sa Sugbo bisan pa man nagkaduol na ang adlaw sa Pasko  sumala pa sa kadagkuan sa Department of Trade and Industry(DTI)-7.

Sa pagsugat sa Pasko ilabi na sa Bag-ong Tuig di gyud mawala sa lamisa sa mga Filipino ang mga handa sama sa spaghetti ug uban pa.

Gipasalig sa DTI-7 nga walay nahitabong dakong pagtaas sa presyo sa maong mga produkto.

Sa uwahing gipagawas nga Suggested Retail Price alang sa mga noche buena products dinhi sa Sugbo niadtong Nobiyembre 19, sagad sa mga niusbaw sa presyo mao lang ang mga fruit cocktails.

Hinuon,  sagad kanila niusbaw lang og tag 3 sentabos apan ang mga ham, cheese, sandwich spread, mayonnaise, queso de bola, pasta o spaghetti, macaroni, spaghetti sauce, tomato sauce ug creamer, susama ra sa SRP nga gihatag sa DTI niadtong Oktubre.

Ang mga presyo sa ham anaa pa sa presyo nga P135 hangtud P139 sa  matag 500 grams, labing mahal ang 3-10 kilograms nga ham tag P829.

Ang mga cheese nagkantidad og P42 ngadto na sa P58, samtang ang pasta adunay mapalit sa kantidad nga P19 ug ang labing mahal nagkantidad og P87

Kasagaran usab sa mga gatas ang di g’yud mousbaw sa ilang mga presyo kay padayon pa ang gipatumang price freeze sa mga batakang panginahanglanon sa publiko sa tibuok probinsya sa Sugbo lakip na ang Metro Cebu, human kini gipaubos sa state of calamity tungod sa pag-igo sa bagyong Ruby.

Lakip sa padayong wala nimahal mao ang mga canned sardines, kape, ug mga detergent/ laundry nga sabon.

Pahimangno  sa DTI sa mga konsumidor sa kanunay’ng magbinantayon sa mga presyo sa gipamalit, ug mas maayo usab ang mohimo’g pag-canvass aron makabarato.

Samtang alang sa mga manindahay nga sobra ra mopatong sa mga original SRP sa ilang mga baligya, kun masakpan sa monitoring team sa DTI, posible kining mag-atubang og penalty o pagkatangtang sa ilang permit. – /EIM) (BANAT NEWS)