Sundawo gidakop sa traffic enforcer

CEBU, Philippines - Gibalhug sa detention cell ang usa ka sakop sa Marines nga nadestino sa Naval Forces Central Command gumikan sa wala pagtuman sa lagda sa trapiko.

Nasuta usab nga nagmaneho sa motorsiklo nga wala’y driver’s license si Staff Sgt. Allan Baringuel, 40-anyos, nagpuyo sa barangay Looc, dakbayan sa Lapu-Lapu.

Si Police Officer 2 Jesson Flores sa Presinto 1 sa Mandaue City Police Office, miingon nga ang sundawo dihang nitadlas sa dalan A.C. Cortes Ave. ug eskina dalan Plaridel daw wala motan-aw sa traffic light sanglit bisan stop signal mipabulhot kini sa pagpadagan.

Gipahunong sa traffic enforcer nga si Ramil Branzuela si Baringuel ug mao’y gitunol ang Student Permit (SP) sa pagmaneho og sakyanan ug nakiglalis dayun mipabulhot na sab sa pagpadagan sa motorsiklo.

Ang kauban nga traffic enforcer ang nakababag ug gidakop ang sundawo. Tukmang mga kaso ang gikatakdang ipasaka batok kang Baringuel.(Romeo T. Limpangog/GMR)

Nagpatuktok sa manok igo sa saag nga bala

Naigo sa saag nga bala ang 26-anyos nga lalaki samtang nagpatuktok sa mga hiniktan nga manok sulod sa tangkal sa barangay Taytay, dakbayan sa Danao alas 8 pasado ang takna kagahapon sa buntag. Si Police Office 3 Arnold Labine sa Danao City Police Station miila sa biktima nga si Reymund Lucero.        Matud ni Labine nga naandan na sa biktima ang pagpatuktok sa mga manok nga igtatari matag sayo sa buntag  apan wala damha nga nabati ang lanug nga buto sa armas. Sa paglabay sa pipila ka gutlo, gibati sa biktima ang pagpamanhud sa tuo nga bitiis. Sa iyang pagsusi, nagdagayday na ang dugo sa iyang bitiis hinungdan nga daling gidala sa tambalanan. (Romeo T. Limpangog/GMR)

Market guard sa

Tuburan nakapusil

Grabeng naangol ang mag-uuma nga napusilan sa market guard sa barangay Cuatro, lungsod sa Tuburan, alas 5 pasado sayo kagahapon sa buntag.

Si Police Officer 3 Roberto Rondina sa Tuburan Police Station miila sa biktima nga si Jesus Senaluba, 38-anyos, taga Sitio Mag-alwa sa nahisgutang lugar.

Ang suspek mao si Jimmy Camingawan, taga Barangay Cogon ug market guard sa lungsod.

Si Police Officer 2 Ariel Maravilla sa Tuburan Police Station nga nahinabi sa Banat News miingon nga nagkalalis ang duha nga misangpot sa pagpamusil. (Romeo T. Limpangog/GMR)(BANAT NEWS)