AFP Red alert na sa pagduaw ni Santo Papa

CEBU, Philippines - Ang liboan ka sakop sa AFP Central Command nga ania magbase sa Kabisay-an gibutang na sa “red alert” sugod kaniadto’ng Disyembre 18 ug taposon kini unya pa sa Enero 19, sunod tuig aron pagsiguro nga linaw ang pagbisita ni Pope Francis sa Leyte karong sunod buwan.

Bisitahan sa Santo Papa ang mga dapit nga grabe’ng nakaangkon og kadaut sa bagyo’ng Yolanda ug iyang pakigkitaan ang mga biktima nga naghinam-hinam na nga makakita sa labing taas nga opisyal sa tinuohang Katoliko.

Si Pope Francis maoy ikaduha nga Santo Papa nga makabisita unya sa nasud human ni Pope John Paul II nga miduaw sa Pilipinas, apil na sa Sugbo kapin sa 20 ka tuig na ang milabay. Si Teniente Heneral Nicanor Viva, commander sa AFP Central Command nga nagbase sa Camp Lapu-Lapu, mimando sa tanan niya’ng sakop sa Kabisay-an nga mutrabaho g’yud aron masanta kun adunay nagplano sa paghimo’g kagubot. Matud ni Teniente Koronel Mario Demaisip, commander sa 3rd AFP Civil Relations Group sa Central Command, nga ang pagdeklarar og “heightened alert status” gitumong aron andam kanunay ang militar sa pagbisita ni Pope Francis.

Gipaabot nga ang pagduaw ni Pope Francis sa Tacloban City nga usa sa nakaangkon og dako’ng kadaut sa bagyo’ng Yolanda tutokan unya sa mga mata sa katawhan sa tibuok kalibutan.

Dili imposible nga adunay mga pundok nga maghimo og kalihukan aron gubton ang pagbisita sa Santo Papa ug kini maoy panalipdan sa militar ingon man sa kapolisan. Pagka karon, ang kadagkoan sa kapolisan ug militar wala’y hunong sa ilang pag-review sa security preparation, ilabi na ang pagdistino og mga intelligence personnel nga maniid sa kalihukan sa katawhan.

Ang AFP Central Command magbutang na og command post adto sa Tacloban sugod karong una’ng semana sa Enero. Matud ni Koronel Demaisip nga ang mga sakop sa 8th Infantry Division nga nagbase sa Samar ug Leyte dugangan nila kini og mga sundalo nga sakop sa 3rd Infantry Division nga nagbase sa Jamindan, Capiz. Ang pasiuna nga report nagkanayon nga si Pope Francis muabot sa Manila unya sa Enero 15 ug muadto sa Tacloban pagka Enero 17 aron bisitahan ang mga biktima nga naluwas sa bagyo’ng Yolanda. (Centcom PR/RUB)(BANAT NEWS)