Lola, lolo patay sa duha ka insidente

CEBU, Philippines -  Patay ang usa ka lola human mibangga kaniya ang usa ka jeep sa iyang paglabang sa dalan  diha sa Barangay South Poblacion sa lungsod sa San Fernando.

Ang biktima naila nga si Zapra Dinopol, 75,  taga Barangay North Poblacion sa nahisgotan nga lungsod. Samtang ang nakadasmag kaniya mao si Epifanio Obaob, 46, taga Tañanas, San Fernando, drayber sa jeep de pasaheroan. Base sa imbestigasyon, milabang sa national highway ang biktima apan wala makabantay ang drayber kaniya hinungdan nga nabanggaan ug nakaangkon og grabeng kadaot sa iyang lawas.

Daling gidala sa Cebu Provincial Hopistal sa dakbayan sa Carcar ang biktima apan gideklarar na siya nga dead on arrival. Ang suspek gitanggong karon sa kapolisan lakip ang sakyanan niini.

Samtang patay na nga napalgan ang usa ka lolo nga naglutaw sa dagat nga giilang si Nazareno Mentupa, 64, sakop sa Bantay Dagat sa lungsod sa Boljoon.

Katapusan kining nakit-ang buhi dihang padulong kini sa guardhouse sa Bantay Dagat sa barangay Arbor, apan matud pa wa makaabot sa guardhouse si Mentupa ug patay na dihang nakit-an sa baybayon.

Gipaubos sa autopsy ang patay nga lawas ni Mentupa aron masuta kun duna bay foul play ang iyang kamatayon.  (BANAT NEWS)