Nanghasi sa rape victim gipadakop

CEBU, Philippines -  Usa ka 27- anyos nga babaye ang nag-atubang og kasong Child Abuse human gidakop sa kapolisan tungod sa reklamo sa menor de edad nga giingong biktima sa suway nga paglugos sa amahan sa maong babaye.

Ang pagdakop nahitabo  diha sa Sitio Barlap, Barangay Casuntingan, dakbayan sa Mandaue diin usa ka Jamida Santillan ang gisikop tungod sa paglapas niini sa Republic Act 7610 tungod sa pag-abuso sa bata.

Si Senior Police Officer 4 Fernando Gabutero sa Presinto 4 sa Mandaue City Police Office miingon nga ang inahan sa bata kapuyo sa amahan ni Santillan nga nabilanggo na tungod sa attempted rape.

Ang minor de edad maoy nipasaka og kaso nga attempted rape batok sa amahan ni Santillan hinungdan sa kalagot sa naulahi nga giingong magsige og sunod-sunod sa biktima bisan sa tulunghaan ug manghulga kaniya.

Gipasakaan og kaso si Santillan pinasikad sa reklamo sa nahisgotang minor de edad ug si Judge Teresita Galanida sa Branch 56 sa Regional Trial Courr (RTC) 7 maoy nagluwat sa warrant of arrest hinungdan sa pagdakop niini. (BANAT NEWS)