Pagsalig sa Filipino sa Kahitas-an dili matumpag sa katalagman - Palma

CEBU, Philippines - Liboan ka mga tindera sa Carbon Public Market ang misimba kagahapon sa ikatulo ka-adlaw sa Misa De Gallo nga gipangunahan ni Cebu Archbishop Jose Palma.

Sa iyang homiliya, gipaambit ni Palma ang iyang mga kasinatian sa Misa de Gallo sa laing mga nasud. Matud niya nga sa tanang nasud nga magmisa niini, 99 percent sa nanambong pulos mga Filipino.

“Ang atong pagpadayag sa atong pagtuo, lainlaing pamaagi. Nahimo kini nga paglaom sa kadaghanan ug sa lainlaing nasud,” matud niya. Matud ni Palma nga angay lang g’yud nga padayunon ang maong misa ilabi na sa siyudad sa Sugbo diin gibansagan kini og “Cradle of Christianity.” “Nilabay ang Yolanda, naay earthquake, naay Ruby pero karong buwana, nagkanta gihapon ta og Joy to the World. Para nato, mangagi man ang bagyo, linog, molupad man ang pila ka mga atop, matumpag man ang mga bato, pero dili man matumpag ang atong pagtuo,” matud niya.  (Jean Marvette Demicillo/EIM)

P16.3M na ang natigom sa “Piso Mo, Hospital ko”

Miabot na og P16.3 milyones ang natigom sa “Piso Mo, Hospital ko” kampanya ni Mayor Michael Rama aron makatigom og pundo sa pagpatukod sa building sa Cebu City Medical Center.

Matud ni Rama nga natagbaw siya sa maong natigom nga donasyon nga gikan sa mga donasyon sa mga driver, tindera, estudyante ug mga ordinaryo nga mga tawo. Malipayon usab si Rama nga ang tanan nga Sugboanon nagtinabangay sa paghatag og hinabag aron matukod ang bag-o nga tambalanan sa dakbayan sa Sugbo.

Nagkanayon si Rama nga dili siya magdali sa pagpatukod sa CCMC kay gusto niya nga mahapsay ug matarong. Nahuman na usab ang final design sa CCMC nga gibuhat ni Architect Espina ug kasamtangan karon gi-bidding ang motrabaho sa CCMC. Padayon gihapon ang siyudad pagdawat og mga donasyon ni bisan kinsa bisan og pormal nang gihunong ang maong kampanya.

Ang CCMC nagkinahanglan og P1.5 bilyones nga pundo aron matukod ang napulo ka andanang building nga makadawat og usa ka libo ka pasyente sa usa ka higayon. (BANAT NEWS)