Nahadlok pusilon natagak patay

CEBU, Philippines - Patay ang usa ka lalaki human milikay sa tawong mipusil unta kaniya apan natagak hinuon kini dul-an 20 ka tiil nga subway sa SRP Seawall sa Barangay Sto. Niño ning dakbayan sa Sugo kagahapon sa kaadlawon.

Ang namatay naila nga si Julieto Bohol Jr., 32, usa ka guwardiya ug taga Barangay Carreta ning dakbayan sa Sugbo, samtang ang kauban niini nga si Rolando Wenceslao, 23, nga taga Barangay Tejero ang natapsingan og bala diha sa iyang dunggan.

Matud pa ni Senior Police Officer 4  Rey Cuyos, ang imbestigador sa maong kaso nga nahinabi sa Banat News, aduna untay gipangita ang duha nga ginganlan og “Nanay” diha sa maong lugar.

Sumala pa nga nalabyan sa duha ang usa ka grupo sa mga lalaki nga nag-inom sa ilang pagpauli, apan gikatahong ang usa sa mga lalaki kalit nga mikupot sa abaga ni Wenceslao ug diretsong mipusil sa ulo niini, apan nakahupo kini ug naigo sa bala ang iyang dunggan.

Gumikan sa kahadlok, mikaratil og dagan si Bohol  apan didto kini natagak sa lawom nga bahin sa subway sa maong lugar ug maayong pagkatugpa diha sa ubos.

Daling nangikyas ang grupo sa namusil samtang gidala sa Cebu City Medical Center (CCMC) ang duha apan gumikan sa grabeng kadaot nga naangkon ni Bohol tungod sa pagkatagak namatay kini.

“Lawom-lawom g’yud to’ng nahagbongan niya, siguro wala ‘to siya kabantay agi sa kahadlok maong didto nahulog,” sigun pa ni Cuyos kinsa nagduda usab nga gipareglahan lang ang duha.

Samtang patay ‘sab ang usa ka drayber sa traysikad  dihang gipusil kini sa ulo sa usa ka lalaking nagsakay og motorsiklo diha sa F. Jaca Street, Inayawan, Cebu City.

Ang biktima naila nga si John Prince Cabaltera, 22, taga Sitio Mahayahay, Barangay Apas ning dakbayan.

Sumala pa ni Cuyos nga nagpaabot og pasahero ang biktima dihang kalit lang miabot ang usa ka motorsiklo ug  gipusil sa back rider  ang agtang sa biktima dayong pasirit palayo sa dapit.

Nakuha sa crime scene ang duha ka basiyo sa .45 caliber nga bala  ug usa ka deformed slug nga gituohang gikan sa armas sa mamumuno.Gidudahang personal ang motibo sa maong krimen. (BANAT NEWS)