Upat ka sakyanan nagkarambola

CEBU, Philippines - Upat ka sakyanan ang nagkarambola nga nakaingon sa grabeng paghuot sa trapiko sa South Road Properties (SRP) human nga usa ka trailer truck nga giguyod nga container van ang mibangga sa mga sakyanan kay nawad-an kini og brake.

Matud pa ni Joy Tumulak ang Operations Chief sa City Traffic Operations Management (CITOM), ang mga nagrambol nga sakyanan gilangkuban sa multicab, taxi, truck de karga ug ang trailer truck.

Giila ang naangol nga drayber sa multicab nga si Elias Vargas, taga lungsod sa Compostela nga gidala sa Cebu City Medical Center (CCMC) human maoy naipit sa duha ka dagkong sakyanan.

Ang drayber sa trailer truck giila nga si Dante Del Rosario, nga gikan pa sa Naga ug paingon sa dakbayan sa Sugbo, samtang ang drayber sa taxi naila nga si Giovanne Sasam ug ang drayber sa truck de karga mao si John Rey Migabon.

Sumala pa ni Tumulak nga nabantayan ni Del Rosario pag-abot niini sa SRP nga di na mopaak ang iyang brakes.

Atol sa maong hitabo tayming ‘sab nga gipahunong sa usa ka traffic enforcer nga si Christian Abellanosa ang multicab ug taxi kay gipaagi niini ang usa ka truck de karga gikan Mambaling paingon sa Plaza hinungdan nga naharos kini ug bangga sa trailer truck.

Gumikan sa pagdasok sa trailer truck sa multicab ug taxi didto sab kini mipilit sa kilid sa truck de karga ug napiit sa tunga ang taxi ug multicab.

Apan swerte lang kay minor lang nga bun-og ang naangkon sa taxi drayber bisan kini naipit sa iyang taxi.

Sigun pa ni Tumulak nga hapit ‘sab naapil sa pagdasok sa mga nagrambol nga sakyanan ang traffic enforcer apan nakadagan palayo.

Alas 10:35 pa napadaplin ang mga sakyanan nga mibabag sa intersection sa maong kalsada ug pasado alas-12 sa udto kini nakuha sa lugar.

Nagpadayon pa ang gihimo nga imbestigasyon sa maong panagbangga samtang gikustodiya na sa CITOM ang drayber sa trailer truck ug truck de karga. (Jojo C. Ugdol/EIM)(BANAT NEWS)