Upat nadakpan sa drug bust

CEBU, Philippines - Upat ka mga gidudahang drug pushers ang nadakpan sa managlahing operasyon sa kapolisan sa dakbayan sa Mandaue ug Cebu City nga miresulta sa pagkasakmit sa mga armas ug drugas.

Sa Cebu City, tulo ang nasikop ug usa niini babaye human nakuhaan og 79 ka pakete nga gituohang shabu ug usa ka pistola nga adunay pito ka bala sa managlahing   buy-bust operations.

Ang Special Operations Group sa City Intelligence Branch ug PDEA-7 milusad og buy-bust operation batok kang Warlito Colina alyas “Walter”, 39, molupyo sa Sitio Paray, Kasambagan.

Usa ka paketeng shabu ang matud pa napalit sa poseur buyer kang Colina hinungdan nga kini gisikop. Apan sa pagrekisa , nakuhaan kini og dugang 60 ka paketeng pulos may sud nga shabu, P2 mil nga kwarta nga gituohang kita gikan sa mga ilegal nga drugas ug ang P300 nga buy-bust money.

Gibanabana nga mukabat sa P180 mil ang balor sa nasakmit nga mga shabu sa suspek.

Matud pa ni CIB Deputy Chief for Operations Inspector Gomersendo Mandaue, dunay mi-text kanila bahin sa operasyon ni Colina, tungod niini duha ka semana nila kining gipanid-an ug dihang nagpositibo, gilusad dayon ang operasyon.

Sa laing bahin, nadakpan usab sa buy-bust operation ang 51-anyos nga si Manuel Talisaysay Reyes alyas “Noling” ug ang kapuyo niini nga si Mary Ann Labita diha sa Sitio San Vicente,  Bulacao.

Nakuha gikan sa duha ang usa ka Para-Ordinance caliber .45 nga pistola nga adunay  mga bala ug 18 ka paketeng may sulod nga gituohang shabu.

Gidala sa prisohan sa CCPO ang duha ug kasamtangang naghuwat sa ipasaka nga tukmang kaso batok kanila.

Samtang usa ka notadong drug pusher sa dakbayan sa Mandaue ang nadakpan ug nasakmitan og duha ka dagkong putos sa shabu ug napulo ka gagmay nga putos niini atol sa buy-bust operation  diha sa UTB Looc, dakbayan sa Mandaue.

Si Police Officer 2 Jessie James Villarino sa Presinto 5 miila sa dinakpan nga si Hernanie Villagan Macaldo alyas Pare Hernan, 44, nagpuyo sa maong dapit.

Matud pa ni Villarino nga nakadawat sila og mga taho labot sa ilegal nga kalihukan sa maong dinakpan sa nahisgutang lugar hinungdan sa gilusad nga operasyon. (Romeo T. Limpangog ug Sharmain Kaye Obra, USJ-R Intern/EIM)(BANAT NEWS)