Nalambigit sa drugas gipusil patay

CEBU, Philippines - Usa ka lalaki nga nagbisekleta ang gipusil patay sa mga wala mailhing mga lalaking luwan sa motor diha sa Sitio Kalabasa sa Karajay, Barangay Gun-ob sa miaging adlaw.

Ang biktima giila nga si Manolito Berame, 49, residente sa Purok Lemonsito, Barangay Gun-ob.

Base sa inisyal nga imbestigasyon ni Senior Police Officer 1 Allan Pantaleon sa Lapu-Lapu City Police Office, ang kapuyo sa biktima nga si Cristitota Rosillos nagkanayon nga si Berame nananghid kaniya nga molakaw aron mobisita sa iyahang mga kabanay sa Carajay. Samtang nagtindak sa iyahang biseklita paingon sa Carajay dunay duha ka lalaking nagmotor nga misunod kaniya ug diretsong mipaulan og bala sa biktima ug daling mipasirit palayo.

Gidala sa Lapu-Lapu City District Hospital si Berame apan gideklarar na kini nga dead-on-arrival. Nakuha sa crime scene ang tulo ka empty shell, usa ka bala gikan sa gituohang .9mm pistol ug upat ka rolyo sa tin foils.  Ang kapuyo sa biktima mibutyag nga tiggamitan ug namaligya og ilegal nga drugas si Berame. Gani nakapiyansa lang kini sa mao gihapong kaso human nadakpan sa Mandaue sa miaging tuig. (BANAT NEWS)