Hardware sa Liloan gitulis
CEBU, Philippines - Mukabat sa P300 mil nga salapi ang nahanaw sa usa ka hardware sa Poblacion, lungsod sa Liloan human gitulis sa duha ka armadong lalaki nga nagsakay og motorsiklo. Ang MJ Royal Enterprises nga gipanag-iya ni Marlon Uy gitulis ala-una pasado sa hapon niadtong Miyerkules.
Matud ni SPO3 Jesson Gayo sa Liloan Police Station nga nagpakaaron-ingnon ang duha ka lalaki nga kustomer dihang nisulod sa hardware ug giduol ang tag-iya nga maoy nagbantay sa kaha niadtong higayona.
Sa pagduol sa duha ka lalaki, kalit kini’ng niibot og armas ug gitiunan dungan ang pagpahibawo nga tulis sa biktima.
Ang tag-iya nga nakalitan wala na makalihok tungod sa gibati’ng kahadlok ug gikuha sa tulisan ang tag P1,000 nga salapi nga gisulod sa kaha.
Nipahimangno pa ang mga tulisan sa dili pagsumbong sa mga polis aron wala’y mabuk-an sa ulo. Usa sa mga tulisan nipaboto sa iyang armas tumong sa linata nga mga pintal nga gi-display sa tindahan.
Matud ni PO1 Allen Leciones, desk officer sa Liloan Police, nga ila pa nga gisubay kung nag-andar ba ang close circuit television o (CCTV) camera sa maong hardware human gikatahong bag-o pa lang kini nga gipaayo ug dili segurado ang tag-iya kung kini nag-andar.
Sigun pa ni Leciones nga daku unta og matabang ang CCTV kay giingong wala nag-helmet ang mga tulisan. (BANAT NEWS)
- Latest
