Bagyong Queenie

CEBU, Philippines - Usa ang kompirmadong usa ang patay, usa ang missing ug dul-an usa ka gatos ka balay ang gibiling kadaot sa tropical depression Queenie nga miigo sa habagatang bahin sa Sugbo kagahapon.

Si Baltazar Tribunalo, hepe sa PDRRMO ang nasagmuyo sa hitabo ug matud niya nga kuwang sa pagpakabana ang katawhan bisan pa sa sayong pahimangno nga mangandam.

Ang namatay giila nga si Alona Baldado,50, kinsa gianod sa baha dihang gibanlas ang ilang balay diha sa Barangay Poblacion 1 sa lungsod sa Malabuyoc.

Samtang swerteng naluwas ang upat niya ka mga anak lakip ang 7-anyos nga  si Jayson kinsa diriyot usab naanod apan nakasaka sa punoan sa lubi.

Kalit

Gikatahong kalit ang pag-awas sa suba mao nga ang mga bata ra ang naluwas apan ang inahan nga si Baldado nadala kauban sa iyang         balay.

Pasado na alas -9 sa buntag nakita ang patay nga lawas ni Baldado duol sa Sariling River nga miawas tungod sa pagbunok sa uwan. Laing balay nga nabanlas gipanag-iya nila ni Eduardo Satar ug Tony Lecera.

Base sa talaan sa Provincial Disaster Risk Reduction and Management Office (PDRRMO) nga ang Poblacion 1 ug Santo Niño maoy nagrabehan.

Samtang naangol ang kagawad sa barangay nga si Magno Pestaño dihang naanod sa baha.  Dunay 30 ka pamilya ang mibakwit ug mipasilong sa balay ni Kapitan Manolito Quiñanola samtang ang uban mihiklin sa Malabuyoc Elementary School.

Ang ubang barangay sa Malabuyoc nga naapektohan sa baha mao ang Looc, Lombo ug Sorsogon.

Missing

Samtang padayon pang gipangita sa lungsod sa Oslob ang mananagat nga si Feleciano Looc,45, nga kalit lang nawala samtang naglangoy paingon sa iyang pumboat sa kadagatan sa Barangay Alo sa maong lungsod.

Duna say mananagat sa Barangay Poblacion, lungsod sa Samboan ang napadpad ug naluwas diha sa Barangay Bonbon nga giilang si Rolando Mayorga.

Hasta ang buhatan sa kapulisan sa lungsod sa Dalaguete nasudlan og baha nga miabot sa tuhod ang tubig.

Sa lungsod sa Argao, kapin sa usa ka gatos ka pamilya ang mibakwit sa Barangay Jomgao, Bulasa, Langtad, Canbanua, ug Poblacion tungod sa pagsaka sa tubig.

Ang mga mibakwit diha kini gipahiluna sa Cerge Remonde Sports Complex ug sa mga eskwelahan ug barangay hall.

Di maagian

Duha ka footbridges sa  Argao ang wala paagii tungod sa pagsaka sa tubig sa sapa.  Ang Langtad Bridge sa Argao, Sulong-on Bridge sa lungsod sa Dalaguete ug Poblacion 1 bridge sa Malabuyoc ang wala usab paagii.

Dunay mga karsadang wa paagii tungod sa baha, pagdahili sa yuta ug nakaali nga natumbang mga kahoy.

Sa Barangay Poblacion, lungsod sa Sibonga , 29 ka pamilya nga nagpuyo daplin sa baybayon ang mibakwit.

Stranded

Dul-an usa ka gatos ka pasahero ang natanggong sa Toledo City nga paingon sa San Carlos City Negros Occidental tungod sa bagyo.

Gawas sa mga pasahero dul-an usab sa 20 ka mga cargo trucks ang natanggong sa pantalan.

Sa Cebu City, upat ka Kaohsiung buses ang gipahakot og mga na-stranded nga mga pasahero sa dalan tungod sa kanihit sa mga nibiyahe.

Cebu City

Bisan sa pagsige og uwan sud sa dul-an duha na ka adlaw way pagbaha ug landslides nga nahitabo sa siyudad sumala pa ni Cebu City Councilor Dave Tumulak, tsirman sa Cebu City DRRMC.

Nagtuo si Tumulak nga ang pagpakabana sa mga barangay officials ug sa publiko nga dili na magpataka og labay sa ilang basura ang hinungdan niini.

Duna pay bagyo

Si weather specialist Oscar Tabada sa Pagasa -Mactan mipahimangno nga  mosulod ang bagyong Ruby nga mosentro sa pag-igo dinhi sa Sugbo karong umaabot Disyembre 3 ngadto sa 6 niining tuiga.

Matud pa niya, duna pay duha ka bagyo ang gipaabot nga moigo dinhi sa nasud ning tuiga maong angay nga mangandam. (BANAT NEWS)