Nagsuyop nagdinaganay, usa nadakpan

CEBU, Philippines – Usa ang nadakpan samtang naglumba sa pagpanagan ang mga lalaki nga naaktohan sa kapolisan nga nag-pot session sa barangay Buagsong, Cordova alas 4 ang takna sa niaging kadlawon.

Si SPO1 Llovero Beroy Agosto sa Cordova Police Station miila sa nadakpan nga si Ismael Codilla (dili ang opisyal sa bombero), 47-anyos.

Sila si SPO1 Niño Barabad ug SPO1 Cecilo Retuya ang nagpahigayon og foot patrol dihang ilang nasigpatan ang nagtapok nga lalaki nga kalit lang nagdinaganay. Matud ni SPO1 Agosto nga si Codilla nga nagpiyong-piyong pa sa iyang mata nga naghingos sa aso ang wala dayun nakalihok hinungdan nga daling gisignit ug gipusasan. Ilang nasakmit ang mga ebidensiya nga naglakip sa tulo ka tinfoil,  duha ka plastic nga may lama sa gisulod nga shabu ug lighter. – /GMR) (BANAT NEWS)