Duha nadunggaban, usa minor de edad

CEBU, Philippines – Nakaangkon og samad dinunggaban ang usa ka minor de edad ug laing usa sa managlahing dapit sa barangay Mactan, dakbayan sa Lapu-Lapu sa niaging Martes.

Ang 17-anyos nga tinun-an sa Alternative Learning Systems ang gidunggab sa usa ka Renan Aying, 21-anyos. Matud ni PO2 Jade Querubin sa Lapu-Lapu City Police Office nga nagkuyog sa videoke ang duha ug nagkanta-kanta alas 5 sa hapon. Apan nagkalalis ang duha nga niresulta sa pagpanunggab.

Ang biktima nga gidala sa tambalanan naka-angkon og samad sa wala’ng bahin sa bukton samtang ang suspek ang daling nisibat.

Samtang usa ka Roman Booc, 37-anyos nga taga sitio Dapdap ang gidunggab sa iyang silingan nga si Rolando Latoja, 39-anyos, kinsa lumad nga taga Villareal, Western Samar ug usa ka construction worker. Matud sa imbestigasyon ni PO3 Lydo Pinos, ang biktima nakigtagay sa iyang amigo dihang kalit nga mitunga si Latoja ug nanunggab.

Nakaangkon og samad dinunggaban si Latoja sa iyang bitiis ug dali nga gidala sa Lapu-Lapu City District Hospital.

Suya ang gituohang motibo sa pagpanunggab sa suspek kinsa nasikop ra sa kapolisan. – /GMR) (BANAT NEWS)