VM Isko Moreno nasagmuyo sa PNP-Leyte

CEBU, Philippines – Si Bise Mayor Francisco “Isko Moreno” Domagoso sa Manila City nasagmuyo sa kalangay sa dagan sa imbestigasyon bahin sa pagpatay kang Bise Mayor Claudio Martin Larrazabal sa Villaba Leyte niadtong miaging semana.

Si Moreno kinsa maoy presidente sa Vice Mayors' League of the Philippines (VMLP) miduaw sa buhatan ni Bise Gob. Agnes Magpale kagahapon, mipadayag sa mga sakop sa media sa kasagmuyo ngadto sa kapolisan.

Gipanawagan ni Moreno ang Philippine National Police (PNP) nga hatagan og dakong pagtagad ang kamatayon sa iyang miyembro nga si Larrazabal.

Matud ni Moreno nga nibisita siya sa nagkadaiyang buhatan sa iyang mga miyembro sa VMLP.

Dugang ni Moreno nga nasubo siya tungod sa kahinay sa maong kaso tungod kay hangtod karon wala pay lead ang kapulisan kung unsay motibo ug kung kinsa nagpaluyo sa kamatayon ni Larrazabal.

"Nagtataka kasi kami kung bakit ‘pag mayor ang namamatay ang bilis ma-resolve ng kaso pero kung vice mayor, lead pa lang ang tagal-tagal na. Gusto naming bigyan nang hustisya ang mga naulila ni Larrazabal," asoy ni Moreno

Giklaro usab ni Moreno nga walay dala pamulitika ang iyang pag-ari sa Sugbo apan wala sab niya gililong ang iyang plano nga modagan pagka-mayor sa Manila karong umaabot 2016. – /EIM) (BANAT NEWS)