Drug test sa mga estudyante sugdan na

CEBU, Philippines – Ipaubos na sa random drug testing ang mga tinun-an sa high school sa mga publikong tunghaan  sa dakbayan sa Sugbo sugod sa sunod tuig ubos sa pagdumala sa Cebu City Office for Substance Abuse Prevention (COSAP).

Matud ni COSAP chief Alice Utlang, ang tumong niini nga mapugngan ang grabeng adiksyon sa kabatan-onan samtang sayo pa.

Sigon ni Utlang i-evaluate kun asa na nga estado ang mga estudyante nga magpositibo sa paggamit sa ginadiling drugas.

Ang paggamit niini adunay upat ka estado: una ang peer pressure, ikaduha ang occasional nga paggamit, ikatulo ang drug addiction ug ikaupat ang drug dependency.

Matud pa niya, ang libreng out-patient rehabilitation program sa dakbayan motabang sa mga drug positive sa unang duha ka estado samtang ang ikatulo ug ikaupat nga estado kinahanglan na kining i-admit sa rehabilitation center.

Nagkanayon si Utlang nga walay libre nga rehabilitation center ang gobiyerno.

Gawas niini, sa unom ka tunghaan nga ilang gikonsulta mahitungod niining maong lakang usa lang ang adunay licensed guidance counselor – ang uban gi-designate lang.

Matud niya nga sa ilang pagsuroy-suroy, tanan nga mga ginikanan ang nisugot sa random drug test.

Gisaad ni Utlang nga “confidential” ang mga ngalan sa mga tinun-an nga posibleng magpositibo sa ginadiling drugas ug ang ginikanan lang nila ang makahibawo.

Base sa pagtuon nga gihimo marijuana ang sagad nga gigamit sa mga tinun-an.  – /EIM) (BANAT NEWS)