Nagmotor patay sa gi-park nga trak

CEBU, Philippines - Patay ang usa ka wala pa mailhing lalaki human nga nabangga ang motor nga iyang gimaneho sa usa ka trak sa Barangay North Poblacion sa dakbayan sa Naga.

Si Police Office 3 Kim Cabrera, desk officer sa Naga City Police Station, nga nahinabi sa Banat News miingon nga ang drayber sa nakadasmag nga trak mao si Joel Bayato, 26, taga Ayungon, Negros Occidental.

Base sa imbestigasyon, ang trak nag-park sa kilid sa dalan paatubang sa lungsod sa San Fernando apan wala kini mag-signal og hazard ug wala ‘sab kini nagbutang og early warning device (EWD).

Dugang ni Cabrera nga ang motor padulong sa habagatang bahin wala makabantay nga dunay nag-park nga trak sa kilid hinungdan nga maayong pagkabangga niini.

Tungod sa kakusog sa pagkabangga natumba ang motor ug nalabay ang nagmaneho sa motor.

Gidala dayon siya sa South General Hospital apan gideklarar nga dead on arrival.  Hangtod sa pagsulat niining balita wala pa gyud mailhi ang maong lalaki nga nagmaneho sa puwa nga motor.

Kasamtangang natanggong sa Naga City Police Station ang drayber sa trak. (Bryner L. Diaz/EIM)  

Tulo ka balay sa Lahug naugdaw

Tulo ka mga balay ang nangaugdaw samtang usa ang partially-burned human nga miulbo ang usa ka sunog sa Sitio Upper La Guerta, Barangay Lahug ning dakbayan sa Sugbo kagabii.

Ang kabomberohan sa siyudad sa Sugbo nakadawat sa alarma alas 5:58 sa hapon human nga mitawag ang usa ka May Castillo kabahin sa sunog nga miulbo sa ilang dapit.

Matud pa sa imbestigasyon sa Bureau of Fire Protection sa dakbayan, ang sunog nagsugod sa panimalay sa usa ka Evelyn Mahusay nga hingpit nga naugdaw.

Naugdaw usab ang panimalay nila ni Tata Urongan ug Dino Pepito samtang atol ning pagsuwat sa balita padayon pang giila sa kabomberohan ang tag-iya sa balay nga nakan-an sa kalayo.

Sumala pa ni Fire Officer 3 Fernando Iban nakontrolar ang kalayo alas 6:40 na sa gabii.

Wala’y gikatahong naangol o nakalas sa maong hitabo samtang padayon pang giimbestigar ang hinungdan niini ug ang danyos sa maong sunog.

Usa sa gisusi sa arson investigators ang impormasyon nga giingong pirmeng way tawo ang balay diin magsugod ang kalayo, apan nabantayan nga pirmeng magsiga ang suga niini. (BANAT NEWS)