Metro Cebu malinawon atol sa Pacquiao-Algieri fight

CEBU, Philippines - Namingaw ang kadalanan sa Metro Cebu atol sa oras sa sangka ni Pambansang Kamao Manny Pacquiao ug Amerkanong si Chris Algieri didto sa Cotai Arena, sa Macau kagahapon.

Sa dakbayan sa Mandaue nagmingaw ang kadalanan tungod kay wa kaayoy nanagan nga mga sakyanan tungod kay nag-apong ang mga drayber sa telebisyon sa nagkadaiyang lugar.  

Si Dino Bargamento  sa Command Center sa Mandaue City miingon nga  base sa nakita nila sa  ilang CCTV cameras sa mga nag-unang dalan sa siyudad  menus kaayo ang mga nagdagan.

Matud pa ni Bargamento sa Banat News nga sa mga ordinaryo nga mga Domingo nga ilang mamatikdan nga anaa lamang sa 70 porsiyento ngadto sa 60 porsiyento ang gidaghanon sa mga sakyanan nga magdagan sa kadalanan, apan kagahapon luag kaayo ang mga dalan.

Sagad sa mga tawo adto nagpunsisok sa nagkadaiyang pay per view sa mga covered courts o ba kaha sa mga sinehan, hotels, restaurants ug bisan na sa mga karenderya nga dunay pay-per-view aron mosaksi sa lain na usab nga kadaugan ni Pacquiao.

Samtang sa Cordova, si Senior Police Officer 1 Llovero Agosto miingon nga alas-9 pa sa buntag namingaw na ang kadalanan sa lungsod tungod kay nanghunong og biyahe ang mga  drayber  traysikol, traysikad ug mga multicab nga pasaheroan.

Sa siyudad sa Lapu-Lapu, si Police Officer 2 Melvin Cosedo, radio operator sa Lapu-Lapu City Police Office (LLCPO) nga nahinabi sa Banat News miingon nga wa silay nadawat nga alarma atol sa oras sa away ni Pacquiao, mingaw usab kaayo ang kadalanan.

Sa habig usab sa Cebu City, dunay usa ka alarma nga nadawat ang Mobile Patrol Group, apan wala kini koneksyon sa sangka.

Usa ka lalaki nga hubog ang ilang gihipos ug gidala sa Guadalupe Police Station.

Sama sa ubang lugar, mingaw ang kadalanan sa dakbayan sa Sugbo ug pipila lang ka mga sakyanan ang nagdagan. Way traffic accident nga natala sa Traffic Patrol Group nianang mga orasa. Gikalipay sa mga nanan-aw ang kadaugan ni Pacman nga unom ka higayon mipalukapa sa undefeated nga si Algieri ug pwerteng abiba sa mga boxing fans niini. (BANAT NEWS)