OBO way professional mech. Engineers
CEBU, Philippines - Walay mga Professional Mechanical Engineer ang Office of the Building Official o (OBO) dinhi sa Sugbo.
Base sa Republic Act 8495 o Act Regulating the Practice of Mechanical Engineering in the Philippines, kinahanglan nga dunay Professional Mechanical Engineers (PME) ang OBO.
Si Councilor Nestor Archival Sr. moduso unta og ordinansa nga magmando sa tanang establisamento sa siyudad nga kinahanglang duna silay kaugalingong PMEs.
Apan nasayran sa public hearing nga mismo ang OBO way PMEs hinungdan nga gikwestyon karon ang ordinansang gipangamahanan ni Archival.
“I think it is very important because nag-review ta sa mga plano when, in fact, sa ato mismo sa city, wala ta mi-abide sa law, and this is one thing we should realize. Probably OBO should make intervention,” matud pang Archival.
Si Engr. Victor Acenas sa OBO miingon nga kun maaprubahan ang ordinansa sa konsehal, dili sila makatuman niini sa pagkakaron.
Ang OBO maoy gitahasan sa pag-isyu sa permit sa pagtukod, ancillary permit, accessory permit, occupancy permit ug mga certifications ug magpahamtang multa, silot ug surcharges.
Si Engr. Vicente Vosotros kinsa usa ka mechanical engineer miingon nga daghang kategoriya ang Professional Regulatory Commission (PRC) paghatag og lisensiya kini sama sa certified plant mechanic, mechanical engineer ug professional mechanical engineer.
Matud niya kadto lang mga kompanya nga dunay mechanical rating nga 2000 kilowatts requirement sa ilang operasyon maoy nagkinahanglan og professional mechanical engineer sama sa mga hotels.
Tungod niini, si Ramon Picornell, ang presidente sa Philippine Society of Mechanical Engineers miingon nga importante g’yud nga dunay PMEs ang local government units. (BANAT NEWS)
- Latest
