Piyansado gitabanga’g pusil

CEBU, Philippines - Usa ka lalaki nga bag-ohay lang nakapiyansa tungod sa kaso sa illegal drugs ang gipusil patay sa mga wala mailhing mga lalaki diha sa Barangay Pajo dakbayan sa Lapu-Lapu. Giila ni Police Officer 3 Luisito Ernie sa Lapu-Lapu City Police Office, ang biktima nga mao si Joselito "Potoy" Llenes, 44, residente sa maong barangay.

Matud pa nga nakig-inom ang biktima sa iyang anak ug usa ka amigo  diha sa Sitio Bridge Site dihang dunay miabot nga upat ka lalaking nagsakay sa duha ka motor ug diretsong mipusil ni Llenes. Kaso sa drugas ang gidudahang anggulo sa krimen. Sumala pa ni Ernie, nadakpan sa miaging tuig tungod sa illegal drugs si Llenes ug nakapiyansa kini di pa lang dugay.

Usa ka cellphone, mga drug paraphernalia ug mga paketeng wala nay sud ang nakuha gikan sa bulsa sa biktima. Na-recover sa crime scene ang upat ka basiyo sa bala nga kalibre .45.

Padayon pa ang kapolisan sa ilang imbestigasyon aron pag-ila sa mga mamumuno. (BANAT NEWS)