Pusher mipaulbo’g granada

CEBU, Philippines - Usa ka drug suspect nga dakpon unta sa kapolisan ang naangol human nisukol sa mga polis apan nakapabuto pa og granada ug nakaamong og sibilyan diha sa lungsod sa Tuburan.

Ang nasikop naila nga si Jonald Calaunan alyas Empoy, 25, taga Barangay 3, samtang ang napagan ug naangol mao si Jiosias Jugan, 30, usa ka tattoo artist nga taga Daanlungsod sa Tuburan.

Si Police Officer 2 Roland Duran, desk officer, nga nahinabi sa Banat News miingon nga ang grupo ni Senior Inspector William Homoc, hepe sa Tuburan mipahigayon sa buy- bust operation batok kang Calaunan.

Usa ka polis ang mipalit sa suspek og shabu bali’g P300 atubangan sa balay niini, apan dihang dakpon na unta kini, nakahulbot kini og granada hinungdan nga gipusil siya ni Police Officer 1 Maverick Polotan.

 Si Calaunan naigo sa iyang wala nga dapi-dapi ug natumba ug nabuhian ang granada padung sa kalapokan apan naibot na ang pin niini ug mibuto.

Sumala pa nga naanghelan ang mga polis nga nanghapa tungod kay ang pagbusikad sa granada padulong sa ibabaw ang direksyon.

Apan si Jugan nga naa sa duol naigo sa shrapnel  diha sa iyang liog ug walang abaga ug daling gitabang ug gidala kauban sa suspek diha sa Tuburan District Hospital. Si Calaunan gibalhin sa Vicente Sotto Memorial Medical Center samtang si Jugan luwas  sa makuyaw nga kahimtang.

Nakuha sa kapolisan gikan sa suspek ang usa ka dakong putos nga may sud nga gituohang shabu, unom ka medium size nga putos nga duna gihapoy sud nga shabu, drug paraphernalia ug P400 nga gituohang halin sa drugas.

Bugtong narekober sa kapolisan nga bahin sa granada ang safety lever niini diha sa crime scene.

Ang suspek gihulagway nga usa ka  level three drug pusher apan nalakip kini sa listahan sa mga drug personalities sa maong lungsod.

Kasong paghupot ug pagpamaligya og ilegal nga drugas ug kasong kalapasan sa Comprehensive Law on Weapons and Ammunitions ang ipasaka batok kang Calaunan. (BANAT NEWS)