CEO sa kompanya gipusil patay

CEBU, Philippines - Chief executive officer (CEO) sa usa ka real state company ang gipusil patay diha sa barangay Calajoan sa lungsod sa Minglanilla.

Ang gipatay mao ang CEO sa RBN Realty nga si Romeo Cabaluna Jr., 36, taga Tulay, Minglanilla human gipusil sa wala mailhing mga lalaki nga luwan sa usa ka motorsiklo.

Ang biktima luwan sa iyang motor kauban ang iyang higala nga si Isidro Faunilian gikan sa sitio Bacay apan pag-abot nila sa  Calajoan kalit nga nibunok ang ulan maong nihunong sila aron unta mopasilong.

Mihunong usab ang usa ka motorsiklo diha sa ilang tungod sakay ang duha ka lalaki nga pulos nagtaptap og itom nga panapton sa nawong ug ang backrider  mipusil sa ulo sa biktima duha ka higayon.

Daling gidala ang biktima sa Minglanilla District Hospital apan gideklarar kini nga dead on arrival.

"Kato ra gyud siya (biktima) ang ilang punterya," sigon ni Minglanilla Police Station Police Officer 2 Nikki Carlo Plarisan.

Giimbestigar pa sa kapolisan ang motibo sa maong hitabo nga naglakip sa negosyo ug personal.(Sharmaine Kaye Obra, USJR-Intern/EIM)(BANAT NEWS)