Nilikay sa drug test manubag

CEBU, Philippines - Gipa-esplikar ang duha ka konsehal sa usa sa mga barangay sa lungsod sa Asturias human sila giingong nisibat atol sa drug test niadtong Miyerkules.

Ang drug test gipahigayun sa Cebu Provincial Anti-Drug Abuse Commission (CPADAC), Municipal Anti-Drug Abuse Council (MADAC), Association of Barangay Councils (ABC) ug Department of Interior and Local Government (DILG) alang sa mga opisyal, tanod ug mga kawani sa barangay.

Gipundok sa gym tupad sa barangay hall ang mga hingtungdan alang sa symposium apan kini gi-locked aron wala’y makagawas una pa gipahibawo ang drug test.

Duha ka konsehal ang nangawagtang ug wala nasayri diin niagi.

Matud ni CPADAC executive director Joey Hererra nga gikontak ang duha sa mga organizer ug usa kanila nitubag sa text message ug nisaad nga mobalik human sa 30 minutos apan wala na gyud nibalik ang duha sa gym.

Mikabat sa 18 ka mga tanod, opisyal ug kawani sa barangay ang napaubos sa drug test apan wala’y nagpositibo.  (BANAT NEWS)