Re-routing karong Domingo

CEBU, Philippines - Andam na ang tanan alang sa kapistahan sa Christ the King karong Domingo.

Alas 4 sa hapon si Arsobispo Jose Palma mopasiugda og Santos nga Misa atubangan sa Kapitolyo ug sundan sa prosesyon nga gipaabot nga apilan sa mokabat 15 mil ka tawo padulong sa Plaza Independencia subay sa Osmeña Boulevard.

Ang kalihukan mao usab ang dry-run sa umaabot International Eucharistic Congress (IEC) sa 2016 diin samang lugar ug rota ang gamiton.

Ang kagamhanan sa siyudad sa Sugbo sa ilang bahin dunay mga emergency hotlines sama sa 09325327770, 09471780000, 09177222343, 262-1424 ug 166 nga mahimong tawagan sa mga tawo kun dunay mga emerhensiya.

Si Konsehal Dave Tumulak mipahibawo nga dunay mga ambulansiya nga ibutang sa mga strategic areas samtang nagbutang usab sila og mga CCTV cameras ug drone aron ma-monitor ang lihok sa mga tawo.

Ipakatap usab sa City Traffic Operations Management (CITOM) ang dul-an 200 ka enforcers samtang alas 10 pa lang sa buntag sirad-an na ang mga apektadong dalan nga maigo sa rota sa prosesyon.

Ang mga maapektuhang dalan mao ang Capitol Area, N. Escario-Osmeña Blvd. lahos sa Downtown Area, Colon St., D. Jakosalem St., MC Briones St. hangtud sa MJ Cuenco Ave., paingon sa Plaza Independencia. Tanang rota nga molabang sa Osmeña Blvd. ang sirado hangtud mahuman ang prosesyon.

Giawhag sa CITOM ang mga motorista, drayber ug uban pa nga mogamit sa dalan sa pagbantay ug sa pagsunod sa mga traffic signs aron malikayan ang traffic congestion. (Decemay P. Padilla ug Lengy Mae Mariot ug Lorelyn D. Dechos/GMR) (BANAT NEWS)