Presyo sa buwak ni-doble

CEBU, Philippines - Mikusog ang palit sa buwak sugod pa lang kagahapon Oktubre 31, apan namatikdan nga mi-doble ang presyo niini sa naandang presyo.

Sa dakbayan sa Sugbo, gipasirad-an ang dalan P. Lopez gikan sa dalan Borromeo paingon sa Magallanes kilid sa University of San Jose Recoletos (USJR).

Apan nasayran nga misaka g’yud ang presyo sa buwak tungod sa kataas sa demand niini karon.

Daghang mga mamalitay ang miingon nga kun kaniadto makapalit sila og tagduha ka pungpong, karon tagsa na lang tungod kay mi-doble ang presyo niini.

Sa dakbayan sa Mandaue  mikusog usab ang negosyo sa buwak diha sa Barangay Mantuyong ug Barangay Guizo timailhan niini ang pagdasok sa mga tawong mamalit.

Paborable kaayo ang mga naninda og buwak tungod kay duol ra man ang tulo ka dagkong sam-ang  sa Mandaue naglakip sa gidumala sa kaparian sa Saint Joseph Parish Church sa maong dakbayan ug duha pa ka pribado nga menteryo.

Ang magtiayon nga Willy Sanico ug Charlene Sanico nga naninda og buwak sa maong dapit miingon nga inangkat nila ang mga buwak sa ilang mga silingang nananom niini sa bukid.

Giangkon ni Charlene, kinsa mao g’yuy naninda niini sanglit nagtrabaho man sa usa ka radio station iyang bana, dako ang pagsaka sa presyo sa mga bulak karon.

Matud niya way pag-usab ang gidak-on sa pungpong apan  misaka ang presyo niini.

Kini sama na lang sa Malaysian Mumps nga ang 25 ka sticks nga ilang gibaligya og P100 sa ordinaryo nga mga adlaw,  P180 na  karong panahona.

Ang tapaytapay o burlas ug wonder white nga P60 ang pungpong sa ordinaryo nga adlaw nahimo nang P100 karong panahona. Aron dunay dugang atraksyon, gisagol-sagol nila ang nagkalain-laing buwak  nga ilang gibaligya og P150 sa ordinary nga mga adlaw apan P250 na karon.

Gipaabot nga karong adlawa, mas daghan pa g’yung mamalit og buwak ilabi na kadtong karon pa lamang nakahigayon pagpangompra. (Romeo T. Limpangog/EIM)(BANAT NEWS)