Nakigpinusilay sa kapolisan, usa patay
CEBU, Philippines - Patay ang usa sa duha ka armadong tawo nga nakigpinusilay sa kapolisan sa Poblacion, dakbayan sa Danao alas 12 pasado sa niaging gabii.
Si PO2 Ronald Gomez sa Danao City Police Station miila sa namatay nga si Luigui Cortes, hingkod nga taga Tuburan Sur ug ang kauban mao si Joe Aian Gomez, 31, taga barangay Togonon sa maong dakbayan.
Ang team nga gipangulohan ni PO3 Fiel Restauro nitubag og alarma sa armadong mga tawo sa lugar.
Dihang nahidangat sa lugar ang kapolisan, ilang gisita ang duha ka lalaki kinsa kalit lang namusil apan wala naka-igo. Daling nakabawos pagpusil si PO2 Rene Catamora II ug naigo ang agtang ni Cortes samtang nitahan ang kauban nga si Joe Aian Gomez.
Gihatud sa Danao Provincial Hospital si Cortes apan gideklarar patay na. Si Cortes nakuhaan og kalibre. 45 ug kalibre .38 ang nakuha gikan kang Gomez.
Ang hepe nga si Superintendent Elmer Lim nimando sa dugang imbestigasyon labot sa maong hitabo. (BANAT NEWS)
- Latest
