P7m shabu nasakmit

CEBU, Philippines - Gibanabanang dul-an kapin P7 milyones nga kantidad nga shabu ang nasakmit ug duha ka gipasanginlang drug pushers ang nadakpan sa duha ka managlahing buy-bust operation sa kapolisan.

Nadakpan kagahapon sa City Intelligence Branch (CIB) sa Cebu City Police Office (CCPO) si Joseph Erson Opena, taga Magsaysay St. Pob.Suba, Cebu City human kini nakuhaan og kapin P6 milyones nga kantidad sa shabu atol sa buy-bust operation pinangulohan ni Superintendent Romeo Santander.

Si Santander nga nahinabi sa Banat News mitug-an nga duha lang ka adlaw ang gihimong surveillance batok kang Opena ug nakita g’yud nila ang operasyon niini hinungdan sa gilusad nga operasyon.

Sumala pa ni Santander nga P12,000 nga kantidad sa drugas ang napalit sa ilang asset gikan ni Opena ug gihamagan dayon nila ang gipuy-an niini sa ikaduha nga andana.

Lima ka dagkong putos sa gituohang shabu nga P5.9 milyones ug duna pay daghang laing  medium size packs niini, salapi nga P17,240  ug mga resibo  sa bangko ug mga transaksyon sa mga money remittance center nga pwerteng daghana.

Sa pakighinabi sa Banat News sa dinakpan kusganon niyang gihimakak ang pasangil. “Di man na akoa, igo ra na gibilin diri,” sigun pa ni Opena, apan wa siya mobutyag kun kinsay nagbilin niini kaniya.

Sa laing operasyon, usa ‘sab ka mag live-in partner ang nasikop sa CIB nga nakuhaan og kapin P1 milyon nga kantidad sa drugas sa Lorega-San Miguel, Cebu City.

Ang mga nasikop naila nga sila si Raffy Abaya, 19, ug Leny Dela Cruz, pulos nagpuyo sa maong lugar, sila giingong napalitan og balor usa ka libo ka pesos nga shabu sa police asset hinungdan sa pag-aresto kanila. Nasakmit pa sa kapulisan ang laing tulo ka dagko nga putos sa drugas nga mikantidad tanan og P1,180,000.

Matud pa ni Santander nga ang maong mga operasyon aksyon nila kini base sa suwat gikan ni Interior Secretary Mar Roxas nga nagpahibalo sa trese ka mga barangay sa Sugbo nga naghitak ang illegal drugs.

Gitanggong na sa karsel sa Cebu City Police Office detention cell ang mga dinakpan nga pulos giisip nga level 2 drug pushers. (BANAT NEWS)