Kabataan sa Sugbo midawat sa Taize Community

CEBU, Philippines - Gatosan ka mga batan-on sa Sugbo ang mitambong sa Taize Prayer Workshop Seminar nga gipasiugdahan sa leader sa Taize Community gikan sa France kagahapong adlawa.

Ang speaker sa maong workshop mao ang kasamtangang leader sa Taize Brothers sa Taize, France nga naila sa pangalan nga Brother Andreas.

Si Fatima Piodos ang assistant coordinator sa Cebu Diocesan Coordinating Council nga nahinabi sa Banat News miingon nga bisan pa man sa pagsulay nga ilang nasugatan kagahapon nagmalampuson lang gihapon ang maong kalihokan.

Matud pa nga nabanggaan ang awto nga gisakyan ni Brother Andreas sa usa ka multicab apan maayo na lang kay duol na sa cathedral nahitabo kini  ug gikan didto naglakaw na lang sila padulong sa venue.

Miabot gyud og 197 ka mga partisipante ug mikabat kini og kapin sa 200  dala na sa mga working committee pinangulohan ni Manilyn Roxas, presidente sa mga batan-on sa cathedral inabagan ni Nerissa Villacorta ubos ni Msgr. Ruben Labajo ang padre kura. Didto gipahigayon ang maong kalihokan sa La Purisima Hall ug gitapos sa Cebu Metropolitan Cathedral.

Tumong sa maong kalihokan nga tudloan ang mga batan-on sa solemni nga paagi sa pag-ampo nga pinasubay sa pamaagi sa mga Taize Brothers.  Ang Taize Community usa ka ecumenical community nga natukod sa France.  (BANAT NEWS)