Horror booth sa Mandaue buksan sa Oktubre 29

CEBU, Philippines - Hingpit nga buksan ang horror booth 2014 sa Dakbayan sa Mandaue karong Oktubre 29 ug matapos usab kini sa Nobiyembre 2 o  adlaw sa kasaulogan sa mga Santos.

Kini nagdala gihapon sa tema nga “Kahadlok Mo, Pinaskohan Ko” nga dunay maayong kahulogan. Ang unang ginang sa dakbayan nga si Sarah Cortes kinsa maoy chairperson sa Mandaue City Council for the Protection of Children sa iyang pamahayag miingon nga mga cast sa horror booth karong  tuiga ang giapilan  sa 60 ka mga actor.

Sila gikan sa grupong Mandaue Pride ug Power Sayaw Performing Arts.

Ang kalihokan gisuportahan sa Kaabag Mandaue Inc. ug mga sakop sa Persons with Disability (PWD) sa dakbayan.

Ang kitaon sa maong kalihokan maoy gamiton alang sa Christmas Party sa 660 ka mga anak sa kabus nga pamilya sa Disyembre 22 ning tuiga.

Diha gihapon sa Mandaue City Sports and Cultural Complex sa Sitio Tribunal, Barangay Centro himuon ang horror booth.

Dunay alang sa mga bata aron sila malingaw ug duna say alang sa mga dagko aron sila malingaw gihapon apan sa makahadlok nga paagi.

Mipasalig si Cortes nga adunay daghang bag-ong makita nga kahadlokan karong tuiga nga wala sa nangagi nilang horror booths.

Mas gi-improve pa karon ang props ug makeup sa mga ungo, manananggal, zombie, tiyanak, white lady, lungon ug uban pa.

Gitataw ni Cortes nga ang unang grupo sa mga cast nga giapilan sa 30 ka mga aktor magsugod sa ala-1 sa hapon hangtod sa alas-6 sa gabii ug laing 30 ka mga cast maoy mopuli ug hangtod na usab kini sa alas -12 sa tungang gabii.

Si Clarence Sanchez nga maoy bise presidente sa Kaabag Mandaue Inc. miingon higpit ang seguridad sa horror booth.

Apan dili alang sa tanan ang horror booth,  dili pasudlon ang mga mabdos, kadtong tawo nga naghambin og balatian ug higpit usab nga gidili sa pagsulod ang magdala sa bisan unsang matang sa hinagiban. (BANAT NEWS)