LTFRB nangandam na sa kalag-kalag

CEBU, Philippines – Karon pa lang ang Land Transportation Franchising and Regulatory Board (LTFRB-7) nangandam na sa nagsingabot nga paghandum sa adlaw sa mga minatay ug santos.

Usa sa ilang preparasyon mao ang paghatag og lugway sa “no apprehension policy” sa mga bus nga mobiyahe gawas sa ilang rota hangtud Nobiyembre 30. Matud sa regional director sa LTFRB-7, Ahmed Cuizon, nga gihimo ang paglugway gumikan sa kalihukan sa Nobiyembre 1 ug 2 diin daghang pasahero ang manguli sa ilang tagsa-tagsa ka probinsiya. Si Cuizon midugang nga dili na kinahanglan nga molukat og special permit ang mga bus nga mobiyahe gawas sa ilang rota  kung naka-apply na kini sa bus rationalization program sa LTFRB. Awhag sa LTFRB-7 ngadto sa mga operators ug drivers nga kinahanglan ang bus nga magdagan sa kadalanan dunay prangkisa, anaa sa kondisyon, ug ang mga drayber maayo ang kahimtang aron malikayan ang disgrasya sa kadalanan. Ang mga sakop sa LTFRB-7 mosuroy gihapon sa mga terminal aron pagseguro nga wala’y molapas sa lagda nga ilang gipagawas ug nanawagan usab sila sa mga pasahero nga kun mahimo sa terminal mosakay ug dili magpaabot sa karsada aron wala’y overloading sa mga bus. – /GMR) (BANAT NEWS)