Appliances gikawat sa tunghaan sa Lacion
CEBU, Philippines – Nahanaw ang mahalon nga mga butang sulod sa lawak saringan sa Consolacion Central School nga gilungkab sa wala hiilhing mga kawatan nga gituohang nagdala og sakyanan.
Si PO3 Norberto Cejas sa Consolacion Police Station nga nahinabi sa Banat News miingon nga alas 12 na kagahapon sa udto nadiskubrehan sa magtutudlo nga si Radith Congson nga mao usab ang nagtaho sa maong hitabo ngadto sa ilang buhatan.
Naglakip sa nahanaw nga gituohang gisakiyo sa mga kawatan mao ang 30 inches nga telebisyon, 19 inches nga computer monitor, DVD player, cassette recorder ug uban pa.
Si Cejas miingon nga nakasulod ang mga kawatan pinaagi sa paglungkab sa luyong bintana sa lawak saringan sa maong tunghaan ug ilang gituohan nga lain ang misulod nga nag-alsa sa pagpagawas agi sa bintana ug lain usab ang nagdawat nga maoy nagkarga ngadto sa nagpaabot nga sakyanan.
Dugang ni Cejas nga ang guwardiya sa maong tulunghaan nga nagbantay sa dapit sa pultahan nga nahimutangan sa guard house wala gyud makamatikod dihang gisulod sa mga kawatan ang nahisgutang tunghaan. – /GMR) (BANAT NEWS)
- Latest
